काठमाडौंका सुकुम्बासी बस्तीमा भएका दुई आत्महत्याका घटनालाई लिएर ‘जेनजी मुभमेन्ट नेपाल’ ले प्रधानमन्त्री एवं गृहमन्त्री बालेन्द्र शाहमाथि छानबिनको माग गर्दै काठमाडौं जिल्ला प्रहरी परिसरमा निवेदन दर्ता गरेको छ।
बल्खु र थापाथली बस्तीमा भएका ती आत्महत्याका घटना सरकारको ‘डोजर अभियान’ का कारण सिर्जित मानसिक तनाव र त्रासको परिणाम भएको संगठनको दाबी छ। प्रवक्ता विजय शाहद्वारा दर्ता गरिएको निवेदनमा मुलुकी अपराध संहिता २०७४ को दफा १०८ (आत्महत्या दुरुत्साहन) बमोजिम छानबिन गरी दोषीमाथि कारबाही गर्न माग गरिएको छ।
सरकारले नदी किनारका बस्ती हटाउने अभियानलाई तीव्र पारेपछि युवा संगठनहरूले यसलाई अमानवीय भन्दै विरोध गरिरहेका छन्। विस्थापित समुदायमा बढेको त्रास र मानसिक स्वास्थ्यको विषयलाई लिएर अहिले प्रधानमन्त्रीको कदममाथि कानुनी प्रश्न उठाइएको हो।
