रामेछाप । मन्थली नगरपालिकाले गरेका र गर्दै आएका विभिन्न कार्यहरुको सूचना नागरिकले माग गरे पनि यर्थाथ सूचना नागरिकले पाउन सकेका छैनन् ।

नेपालको संविधानको धारा २७ मा प्रत्येक नागरिकलाई आफ्नो वा सरोकारको कुनै पनि बिषयको सूचना माग्ने र पाउने हक हुनेछ भनेर सूचनाको हकलाई संवैधानिक रुपमै व्यवस्था गरिएको छ । सरकारले गरेको उक्त व्यवस्थालाई मन्थली नगरपालिकाका प्रमुख प्रशासकिय अधिकृत लिलाराज पौडेलले अहिलेसम्म कार्यान्वयन गरेका छैनन् ।

मन्थली नगरपालिकामा कुनै नागरिकले सूचना माग गर्दा माग गरिए अनुसारको सूचना अहिलेसम्म दिने गरेको छैन् । नागरिकले निवेदन सहित माग गरेको सूचनालाई वेवास्ता गर्दै सूचनालाई तोडमोड हुने गरी हचुवाको भरमा सूचना दिने गरिएको छ । मन्थली नगरपालिकामा मिति २०७८ चैत्र २२ गते औषधी खरिद प्रक्रिया कुन–कुन मितिमा भएको हो र खरिद गरिएका अक्सिटोसिन, मिसोप्रोस्टोल र म्याग्नेसियम सल्फेड औषधी खरिद गरेको सक्कल विलको प्रमाणित प्रतिलिपी माग गर्दै परेको निवेदनमा पालिकाले सहि सूचना नदिई लुकाउँदै आएको छ ।

गत वर्ष नगरपालिकाले औषधी खरिद गरेको बिषयलाई लिएर सूचना माग गर्दा सूचना लुकाउँदै मन्थली नगरपालिकाका प्रमुख प्रशासकिय अधिकृत पौडेलले स्वास्थ्य शाखाका कर्मचारीसँग मिलेमतोमा औषधी खरिदमा पाउनु पर्ने कमिसन नमिलेको भन्दै कार्यालयले खुलाएको टेण्डर नै रद्ध गरेका थिए । पछि औषधी व्यवसायीसँग कमिसनको कुरा मिलेपछि पुनः टेण्डर आव्हान गरेर औषधी खरिद गरिएको थियो ।

यसअघि पनि सूचना माग गर्दा सूचना नदिएकै कारण राष्ट्रिय सूचना आयोगमा नगरपालिकाका सूचना अधिकृत र प्रमुख प्रशाकिय अधिकृत विरुद्ध नागरिक समाजका अगुवा दीपक भट्टले उजुरी समेत पेश गरेका थिए । विभागमा परेको उजुरी पछि राष्ट्रिय सूचना आयोगले तत्काल सूचना उपलव्ध गराउनु भन्ने निर्देशन सहितको परिपत्र गरेपछि वाध्य भएर कार्वाही हुने डरले मन्थली नगरपालिकाले सूचना उपलव्ध गराएको थियो ।

त्यसैगरी मन्थली नगरपालिकाले मन्थली माध्यमिक विद्यालयमा भएको भष्ट्राचार छानविनको लागि गठित समितिले विद्यालयमा छानविन गरी पालिकामा बुझाएको प्रतिवेदनको प्रमाणित प्रतिलिपी माग गर्दा सो सूचना समेत मन्थली नगरपालिकाले लुकाएको थियो । पछि सूचनाको माग गर्दै जिल्ला प्रशासन कार्यालयमा उजुरी परेपछि वाध्य भएर मन्थली नगरपालिकाले सहि सूचना उपलव्ध गराएको थियो ।

सूचना पाउनु पर्ने नागरिकहरुको नैसर्गिक अधिकार भएता पनि मन्थली नगरपालिकाले भने प्रत्येक सुचना लुकाउँदै आएको छ । सरकारी निकायले प्रत्येक तीन÷तीन महिनामा भए गरेका कामको विवरण सार्वजनिक गर्नुपर्ने र वर्षको दुई पटक सार्वजनिक सुनुवाई मार्फत नागरिकलाई जानकारी गराउनु पर्नेमा उक्त दुवै कार्य अहिलेसम्म गरेको छैन् । नागरिकलाई सूचना नदिई लुकाएर मन्थली नगरपालिकाले गम्भिर अपराध गरेको नागरिक समाजका अगुवा विरेन्द्र श्रेष्ठले जानकारी दिए ।