हेटौंडा . बागमती प्रदेशमा सरकार अस्थिर बनेसँगै सत्तारूढ गठबन्धनको समीकरण फेरिने संकेत देखिएको छ। यस्तै राजनीतिक पृष्ठभूमिमा नेकपा (एमाले) बागमती प्रदेश संसदीय दलको बैठक आज बुधबार हेटौँडामा बस्दैछ।
बैठक बिहान ११ बजे हेटौँडास्थित संसदीय दलको कार्यालयमा सुरु हुने एमाले संसदीय दलका प्रमुख सचेतक मधुसूदन पौडेलले जानकारी दिएका छन्। उनका अनुसार बैठकमा पछिल्लो राजनीतिक परिस्थिति, सरकार सञ्चालनको अवस्था, भावी रणनीति र सत्ता समीकरणको सम्भावित पुनर्संरचनाबारे विस्तृत छलफल हुनेछ।
मुख्यमन्त्री बहादुरसिंह लामाले नेपाली कांग्रेसको प्रदेश संसदीय दलको नेताबाट विश्वास गुमाएको पृष्ठभूमिमा एमालेको बैठकले खास महत्व पाएको छ। लामा नेतृत्वको सरकार धराशायी हुने सम्भावना देखिएको बेला एमाले पुनः निर्णायक भूमिकामा उत्रन सक्ने चर्चा राजनीतिक वृत्तमा चलिरहेको छ।
बैठकमा एमालेको आगामी रणनीति, सम्भावित गठबन्धनको स्वरूप, दलहरूको समर्थन जुटाउने रणनीति तथा प्रदेश सरकारमा पार्टीको भूमिकाबारे गम्भीर निर्णय हुने अनुमान गरिएको छ।
प्रमुख सचेतक पौडेलका अनुसार, “प्रदेशमा उत्पन्न अस्थिरताको अवस्था र एमालेको राजनीतिक भूमिका सुदृढ बनाउने विषयमा बैठक केन्द्रित हुनेछ।”
यतिबेला बागमती प्रदेशमा पाँच मन्त्रालय रिक्त छन्। कांग्रेस नेतृत्वका मन्त्रीहरूले लामाविरुद्ध अविश्वास प्रस्तावमा हस्ताक्षर गर्दै राजीनामा दिएपछि ती मन्त्रालय खाली भएका हुन्। सत्ता टिकाइरहन लामा पक्षले नयाँ मन्त्री नियुक्त गर्ने प्रयास गरिरहेको छ भने विपक्षी दलहरूले आ–आफ्नो रणनीति पुनः समायोजन गरिरहेका छन्।
एमालेको आजको बैठकले कुन दिशामा मोड लिन्छ भन्ने कुराले प्रदेश सरकारको भविष्य निर्धारण गर्नसक्ने अवस्था छ। एमाले सत्ता प्रवेशको तयारीमा छ कि नयाँ नेतृत्व निर्माणका लागि वैकल्पिक गठबन्धनको हिस्सा बन्छ भन्ने चासो चुलिएको छ। बैठकपछि एमालेले आधिकारिक धारणा सार्वजनिक गर्ने तयारी समेत गरेको छ।
