रामेछाप । रामेछापका पाँच दलिय गठबन्धनको मंगलवार बसेको संयुक्त बैठकले आगामी बैशाख ३० गते हुने स्थानिय तहको निर्वाचनमा तालमेल गरेर जाने निर्णय गरेको छ ।
केन्द्रमा पाँच दलिय संयन्त्रको बैठकले निर्णय गरेर जिल्लामा पठाएको पत्राचार अनुसार रामेछापमा पनि गठवन्धनले निरन्तरता दिने निर्णय गरेको हो । बैठकमा नेपाली काँग्रेस जिल्ला कार्य समिति रामेछापका पार्टी सभापति पूर्णवहादुर तामाङ (कान्छाराम), नेकपा माओवादी केन्द्रका संयोजक मैनकुमार मोक्तान, नेकपा एकीकृत समाजबादीका अध्यक्ष रमेशकुमार बस्नेत र जनता समाजबादी पार्टीका संघीय परिषद सदस्य रोजबहादुर मोक्तान लगाएतका नेता तथा कार्यकर्ताहरु उक्त वैठकमा सहभागी रहेका थिए ।
पाँच दलिय गठवन्धनको बैठकमा सहभागी भएका नेताहरुले एकले अर्को पार्टीलाई प्रतिकुल असर पर्ने अभिव्यक्ति नदिने र पार्टी र व्यक्तिको अहित हुने किसिमको कुनै पनि गतिविधिहरु नगर्ने, नगराउने निर्णय भएको छ । पाँचदलिय सयुक्त बैठकपछि नेताहरुले संयुक्त हस्ताक्षर सहितको विज्ञप्ती समेत प्रकाशन गरेका छन् । गठवन्धनमा रामेछापमा नेपाली काँग्रेस, नेकपा माओवादी केन्द्र, नेकपा समाजवादी, जनता समाजवादी पार्टी र राष्ट्रिय जनमोर्चा पार्टी सहभागी हुने छन् ।
स्थानिय तहको निर्वाचनमा रामेछापका ८ वटै स्थानिय तहमा पाँच दलिय गठवन्धन मार्फत निर्वाचन होमिने भनेता पनि कुन दलवाट कुन पालिकामा कसलाई उम्मेदवार बनाउने भन्ने बिषयमा छलफल भइरहेको नेपाली काँग्रेस रामेछापले जनाएको छ । पाँच दलिय गठवन्धनले उम्मेदवारको टुङ्गो लगाउन आजै देखी बैठक बसेर गृह कार्य गर्न थालिने नेपाली काँग्रेस रामेछापका सभापति पूर्णवहादुर तामाङ (कान्छाराम)ले जानकारी दिए ।
