रामेछाप । जिल्ला समन्वय समिति दोलखाले जिल्लामा रहेका ९ वटा स्थानिय तहको स्थलगत अनुगमन गरेको छ । जिल्ला समन्वय समिति प्रमुख डवल पाण्डेको नेतृत्वमा निमित्त जिल्ला समन्वय अधिकारी गिता घिमिरे, जिल्ला समन्वय समितिका अन्य पदाधिकारी तथा सदस्यहरुको टोलीले जिल्ला स्थित ९ वटै स्थानीय तह पुगेर अनुगमनलाई तिब्रता दिएको हो । आर्थिक वर्ष २०७८÷७९ को पहिलो चौमासिकमा विकास निर्माणका योजना लगायत अन्य गतिविधिहरुमा भएका प्रगतिबारे जिल्ला समन्वय समीतिले अनुगमन गरेको हो ।
जिल्ला समन्वय समिति प्रमुख पाण्डेले स्थानीय तहमा पारदर्शीता र सुशासन सुदृढ गर्न अनुगमन कार्यलाई प्रभावकारी बनाईएको जानकारी दिए । अनुगमनका क्रममा स्थानीय तहमा समयमै योजना सम्झौता कार्य नभएको, केन्द्रबारे निर्णय नहुँदा र विषयगत कार्यालयहरुको सेवा एकै स्थानबाट प्रवाह नहुँदा सेवाग्राहीले समस्या झेल्नुपरेको, प्रदेशका योजनाहरुबारे स्थानीय तहसँग समन्वयको अभाव रहेको पाईएको बताएका छन् ।
जिल्ला समन्वय समितिको टोलीले मंगलवार मेलुङ र तामाकोसी गाउँपालिकामा अनुगमन सम्पन्न गरेको छ । त्यसक्रममा मेलुङ गाउँपालिकाका प्रमुख प्रशासकिय अधिकृत महेन्द्र विश्वकर्माले चालु आर्थिक वर्षमा ३ सय ९१ वटा योजना उपभोक्ता समिति मार्फत कार्यान्वयन हुनेमा २० वटा सम्झौता भएको जानकारी दिनुभयो ।
यस्तै तामाकोसी गाउँपालिकाका प्रमुख प्रशासकिय अधिकृत निमेश मिश्रका अनुसार चालु आर्थिक वर्षमा करिव ५ सय योजना कार्यान्वयन हुनेमा हालसम्म २२ वटा योजना सम्झौता सम्पन्न भएको बताएका छन् । ८ वटा योजना वोलपत्र मार्फत कार्यान्वयन हुनेछ । गाउँपालिकाको कार्यसम्पादन र सेवा प्रवाहमा जनताको खासै गुनासो नरहेको उपप्रमुख उर्मिला खड्काको भनाई छ ।