रामेछाप । नेपाल डेरी एशोसियसन रामेछापले संसद बिघटनपछि केपी शर्मा ओलीको नेतृत्वको नेकपाको सरकारले कृषिमा विदेशी लगानी खुल्ला गर्ने गरि गरेको निर्णय गलत भएको भन्दै तत्काल उक्त निर्णय फिर्ता लिन आग्रह गरेको छ ।
नेपाल डेरी एसोसिएसन रामेछापले शनिवार मन्थलीमा आयोजना गरेको पत्रकार सम्मेलन मार्फत सो कुराको जानकारी गराएको हो । २०७५ सालमा मात्र कृषिमा विदेशी लगानी खुल्ला गर्ने निर्णय मन्त्री परिषद्ले गरेपछि सो बिषयमा कृषिसँग सम्वन्धित विभिन्न संघ÷संघठनले विरोध जनाएपछि संसदिय समितिको पहलमा तत्काल नै संसदवाट नै सो निर्णय खारेज भएको थियो ।
सो निर्णयलाई अहिलेको वर्तमान केपी शर्मा ओलीको संसद विघटन पछिको सरकारले उद्योग मन्त्रालय मार्फत गएको २०७७ पौष २० गते राजपत्रमा सूचना प्रकाशित गरि कृषिमा विदेशी लगानी खुल्ला गर्ने निर्णय सार्वजनिक गरेको भन्दै तत्काल उक्त निर्णय फिर्ता लिन जोडदार माग गरिएको नेपाल डेरी एसोशिएसनका केन्द्रिय महासचिव प्रल्हाद दाहालले जानकारी दिए ।
उनले भने– निजी क्षेत्रको कृषी क्षेत्रमा अर्वौको लगानी भएको अवस्थामा सरकारले प्रमुख सरोकारवालासँग कुनै सर–सल्लाह नै नगरी राष्ट्र र किसानको हित विपरित अपारदर्शी रुपमा एकल रुपमा गरिएको निर्णयले राष्ट्रको अर्थतन्त्रमा गम्भीर र दीर्घकालीन असर पर्ने भएकाले विदेशी लगानी भित्रन दिनु नहुने महासचिव दाहालले बताए ।
सरकारले नेपालमा बैदेशिक लगानी ल्याउँदा अहिले भइरहेको ग्रामिण रोजगारीमा त्यसको प्रत्यक्ष असर पर्ने हालसम्म कृषि पेशामा आवद्ध भएका व्यवसायीलाई मजदुर बनाउने र त्यसको प्रत्यक्ष लाभ विदेशी लगानीकर्ताको हातमा पुग्ने निश्चित देखिएको नेपाल डेरी एसोसिएसनका केन्द्रिय अध्यक्ष राधाकृष्ण सापकोटाले जानकारी दिए ।
उनले भने– विदेशी लगानी भित्रयाउँदा स्वदेशी व्यवसायीहरुको उद्यमशिलता विकासमा कुठाराघात र किसानको हातमुख जोड्ने मुख्य आयआर्जनको बाटो समेत अवरुद्ध भई देश चरम गरीवि तर्फ धकेलिने भएकाले सरकारले गरेको यो निर्णय तत्काल फिर्ता लिएर स्वदेशी व्यवसायीहरुको हितमा काम गर्न जोडदार माग गर्दछौ । कार्यक्रम नेपाल डेरी एसोसिएसन बागमती प्रदेशका सदस्य भालु श्रेष्ठको अध्यक्षतामा भएको थियो ।
नेपालमा हाल देशभर गरी दैनिक ६२ लाख लिटर दुध उत्पादन हुने गरेको छ, भने ३२ लाख लिटर दुध वजारमा जाने गरेको छ । दुध विक्रीवाट मात्रै दैनिक ६ करोड रुपैयाँ गाउँमा भित्रने गरेको छ । अहिले नेपालमा ६ लाख कृषकहरु प्रत्यक्ष रुपमा लाभान्वित रहेका छन् भने ३० लाख नेपालीले रोजगार पाइरहेको तथ्याङ्क नेपाल डेरी एसोसिएसनको रेकर्डमा देखिन्छ ।