सर्लाही — उखु उत्पादक महासंघ, नेपालले सरकारले तोकेको भुक्तानी प्रक्रिया तथा अनुदान रकम कटौतीविरुद्ध कडा आपत्ति जनाउँदै आन्दोलनमा जाने घोषणा गरेको छ। महासंघका अनुसार सरकारले उखु किसानलाई दिनुपर्ने अनुदान रकममा मनपरी कटौती गरेको र भुक्तानी प्रक्रिया समेत ढिला गरिरहेको कारण किसानहरू सडकमा उत्रिन बाध्य भएका हुन्।
महासंघले जारी गरेको विज्ञप्तिमा उल्लेख भएअनुसार, सर्लाही, महोत्तरी, रौतहट, बारा, पर्सा, सप्तरीलगायत १३ जिल्लाका किसानहरूले बारम्बार माग राख्दा पनि सरकारले बेवास्ता गरेको छ। किसानहरूको श्रमको मूल्य नदिइएको र बजेटमै छुट्याइएको रकम समेत कटौती गर्न खोजिएको भन्दै महासंघले असोज २५ गतेदेखि देशव्यापी आन्दोलन गर्ने चेतावनी दिएको छ।
यसअघि पनि उखु किसानहरूले काठमाडौं माइतिघर मण्डलामा प्रदर्शन गरी सरकारलाई ध्यानाकर्षण गराएका थिए। तर, माग पूरा गर्ने स्पष्ट पहल नभएको महासंघको दाबी छ। विज्ञप्तिमा सरकारले किसानलाई झुक्याउने काम मात्र गरेको र पुनः आन्दोलनको वातावरण सिर्जना गरेको आरोप लगाइएको छ।
महासंघका प्रवक्ता उमाशंकर यादव र संयोजक श्यामबाबु रायद्वारा हस्ताक्षरित विज्ञप्तिमा भनिएको छ, “किसानले माग गरेका अनुदान रकम तत्काल उपलब्ध नगराइए आन्दोलन अपरिहार्य हुनेछ।” साथै, आन्दोलनलाई सफल पार्न सबै जिल्लाका किसानलाई तयारी अवस्थामा रहन आग्रह गरिएको छ।
महासंघले उखु किसानको आन्दोलनमा पूर्वप्रधानमन्त्रीहरू, विभिन्न दलका शीर्ष नेता तथा जनसमुदायले दिएको समर्थन र सहानुभूतिको कदर गर्दै धन्यवाद पनि व्यक्त गरेको छ।
