काभ्रे जिल्लाको रोशी गाउँपालिका–७ का वडाध्यक्ष अशोक कुमार गौतम सरकारी सम्पत्ति व्यक्तिगत रूपमा बिक्री गरेको आरोपमा पक्राउ परेका छन्। जिल्ला प्रहरी कार्यालय, काभ्रेले सोमबार उनलाई काभ्रे भन्ज्याङबाट नियन्त्रणमा लिएको हो।
प्राप्त जानकारीअनुसार, गत असोज महिनामा रोशी खोलामा आएको बाढीले बगाएको फलामे पक्की पुल र झोलुङ्गे पुल वडाध्यक्ष गौतमले कबाडी व्यवसायीलाई बेचेको आरोप लागेपछि प्रहरी अनुसन्धान अघि बढाइएको हो। जिल्ला प्रहरी कार्यालयका डिएसपी तथा सूचना अधिकारी मिनबहादुर घलेका अनुसार, वडाध्यक्ष गौतममाथि आवश्यक अनुसन्धानका लागि अदालतबाट म्याद थप गरेर प्रक्रिया अघि बढाइँदैछ।
स्थानीयवासीहरूले वडाध्यक्ष गौतमले सम्बन्धित निकायसँग कुनै समन्वय नगरी पुल कबाडीलाई मनोमानी ढंगले बिक्री गरेको भन्दै आक्रोश व्यक्त गरेका छन्। कटुन्जेबेशीबाट रघुचौरहुँदै खार्पाचोक, कालिन्चोक र वाइबाडाडा जाने झोलुङ्गे पुलसमेत बिक्री गरिएको स्थानीयले बताएका छन्।
पुल काटेर ट्रकमा लोड गर्न थालिएपछि थानसिङ्गबेशीमा स्थानीय र कबाडी व्यवसायीबीच विवादसमेत भएको थियो। त्यसपछि स्थानीयले प्रहरीलाई खबर गरेका थिए।
सूचनाको आधारमा प्रहरी चौकी कटुन्जेका प्रमुख सई मनु सापकोटाको नेतृत्वमा खटिएको टोलीले जेठ १२ गते राति पुल लोड गरिरहेका दुईवटा ट्रक—बा५ख ४६२६ र बा२ख ४००१ नम्बरका सवारीसाधन नियन्त्रणमा लिएको थियो।
यससँगै, प्रहरीले कबाडी व्यवसायी मुन्दुकुमार र जितेन्द्र पासवानलाई पक्राउ गरेको छ भने टिपर चालक काभ्रेको भुम्लु गाउँपालिका–९ का ४७ वर्षीय मानबहादुर तामाङ र रोशी गाउँपालिका–८ का ४० वर्षीय रमेश लामालाई समेत नियन्त्रणमा लिएको छ।
पक्राउ परेका वडाध्यक्ष गौतमले भने आफूले नमोबुद्ध नगरपालिका–६ सँग समन्वय गरेर मात्र सामान उठाएको दाबी गरेका छन्। यद्यपि, प्रारम्भिक अनुसन्धानमा कुनै औपचारिक प्रक्रिया नपुर्याई बिक्री गरिएको देखिएको प्रहरीले जनाएको छ। घटनाबारे थप अनुसन्धान जारी छ।
