रामेछाप । सरकारी कार्यालयहरुबाट जारी भएको चेक साट्ने म्याद घटेको छ । यसअघि सरकारी कार्यालयबाट जारी भएको चेक ३० दिन भित्र साट्नु पर्ने प्रावधानलाई घटाएर पन्ध्र दिन मात्रै कायम गरिएको छ ।
सरकारले आर्थिक कार्यविधि तथा उत्तरदायित्व नियमावली २०७७ को नियम १३२ (१) मा ऐन संशोधन गरेसँगै सरकारी कार्यालयवाट जारी गरिएको चेक साट्ने म्याद घटाएको हो । यसअघि भइरहेको व्यवस्थालाई परिमार्जन गर्दै सरकारी कोषबाट भुक्तानी लागि जारी गरिएको चेकको अवधि १५ दिन मात्रै हुने कोषतथा लेखा नियन्त्रक कार्यालय रामेछापका प्रमुख कोष नियन्त्रक हेमन्तराज निरौलाले जानकारी दिए ।
उनले भने– मन्त्रालयले गरेको परिपत्र अनुसार हामिले रामेछापका सबै सरकारी कार्यालयहरुलाई परिपत्र गरिसकेका छौं । सरकारी कार्यालयले जारी गरेको चेक भुक्तानी गर्ने म्याद १५ दिन मात्रै भएकाले त्यही अनुसार आवश्यक व्यवस्था मिलाउन परिपत्र कोष नियन्त्रक निरौलाले बताए ।
कोषतथा लेखा नियन्त्रक कार्यालय रामेछापले सदरमुकाम मन्थली र रामेछापमा रहेका राष्ट्रिय बाणिज्य बैंकलाई समेत परिपत्र गरेर कार्यान्वयन गर्न आग्रह गरेको छ ।