रामेछाप । संविधान सभा सदस्य तथा राष्ट्रिय प्रजातन्त्र पार्टीका नेतृ दालकुमारी सुनुवारको निधन भएको छ । रामेछापको उमाकुण्ड ६ गुप्तेश्वर घर भएकी राष्ट्रिय प्रजातन्त्र पार्टकी केन्द्रीय सल्लाहकार समितिकी सदस्य तथा सुनुवार सेवा समाज सङ्घीय सल्लाहकार समितिकी सदस्य सुनुवारको शनिवार दिउँसो निधन भएको हो ।
नेपाल क्यान्सर हस्पिटल हरिसिद्धि ललितपुरमा उपचारको क्रममा मृत्यु भएको राष्ट्रिय प्रजातन्त्र पार्टी रामेछापका जिल्ला अध्यक्ष भरत बाईँवाले जानकारी दिए । लामो समय देखि थाइराईड क्यान्सर रोगका कारण भारतमा गएर उपचार गराई रहेकी सुनुवारलाई केही समय देखि नेपाल क्यान्सर हस्पिटल हरिसिद्धि ललितपुरमा राखेर उपचार गराइँदै आएको थियो । उनको दिउँसो करिब ३ बजेको समयमा उपचारका क्रममा मृत्यु भएको बाईँवाले जानकारी दिएका छन् ।
सुनुवारको पार्थिव शरीर लाई आइतबार बिहान १० बजे देखि अन्तिम श्रद्धान्जलिका लागि राप्रपाको केन्द्रीय कार्यालयमा राखिने र दिउँसो १२ बजे पशुपतिको आर्यघाटमा लगेर दाह संस्कार गर्ने कार्यक्रम तय भएको पनि जिल्ला अध्यक्ष बाईँवाले जानकारी गराएको छ ।
यसै बिच राष्ट्रिय प्रजातन्त्र पार्टी जिल्ला समिति रामेछापले शनिवारै एक विज्ञप्ति प्रकाशित गरी स्वर्गीय दाल कुमारी सुनुवारको निधनले सिङ्गो पार्टी र जिल्लाइनै क्षति पुगेको जनाएको छ । पार्टी अध्यक्ष भरत वाईवाद्धारा जारी विज्ञप्तिमा सानै उमेर देखि राजनीति र सामाजिक क्षेत्रमा क्रियाशील संविधान सभाकी सदस्य तथा एक साहसिक महिला नेतृको निधनले आफ्नो पार्टी र जिल्लाइनै अपूरणीय क्षति पुगेको भन्दै सुनुवारको निधनको खबरले आफू पनि अत्यन्तै मर्माहत भएको भन्दै दिवङ्गत आत्मा प्रति चिर शान्तिको कामना गर्दै उहाँ प्रति भावपूर्ण श्रद्धाञ्जली अर्पण गर्नुका साथै यस दुःखद घडीमा शोक सन्तप्त परिवारजन प्रति हार्दिक समवेदना पनि प्रकट गर्दछु,विज्ञप्तिमा उल्लेख गरिएको छ ।
