काठमाडौं । प्रतिनिधिसभाले शिक्षा, नागरिकता, निजामती, भूमि र संवैधानिक परिषद्सम्बन्धी गरी पाँच महत्त्वपूर्ण विधेयक पारित गर्ने कार्यतालिका तय गरेको छ । सभामुख देवराज घिमिरेले शुक्रबार सिंहदरबारस्थित आफ्नै कार्यकक्षमा प्रमुख पाँच राजनीतिक दलका प्रमुख सचेतक तथा सचेतकसँग छलफल गरेर भदौ महिनाको दोस्रो पाक्षिक क्यालेन्डर सार्वजनिक गरेका हुन् ।
नेकपा एमालेका मुख्य सचेतक महेश बर्तौलाका अनुसार, १२ भदौमै भूमि सम्बन्धी केही नेपाल ऐन संशोधन विधेयक पारित हुनेछ । भूमि व्यवस्था, सहकारी तथा गरिबी निवारणमन्त्री बलराम अधिकारीले विधेयक पारित गर्न प्रस्ताव प्रस्तुत गर्ने सम्भावित कार्यसूची रहेको उनले बताए ।
त्यसैगरी, भदौ १८ गते बस्ने बैठकले नागरिकता विधेयक पारित गर्नेछ भने सोही दिन राष्ट्रपति कार्यालयबाट फिर्ता भएको संवैधानिक परिषद्सम्बन्धी विधेयकमाथि छलफल गरी पारित गर्ने तयारी छ । गत साउन ८ गते राष्ट्रपति रामचन्द्र पौडेलले सो विधेयक फिर्ता गरेका थिए ।
यस्तै, भदौ १९ गते संघीय निजामती सेवा विधेयक पारित गरिनेछ । यसअघि प्रतिनिधिसभाबाट पारित भई राष्ट्रिय सभामा पुगेको उक्त विधेयक पुनः प्रतिनिधिसभामा फर्केपछि पास गरेर राष्ट्रपतिसम्म पठाइनेछ ।
विद्यालय शिक्षा विधेयकलाई भने भदौ २६ गते पारित गरी राष्ट्रिय सभामा पठाउने तालिका बनेको छ । संसदीय समिति (शिक्षा, स्वास्थ्य तथा सूचना प्रविधि समिति)ले यसलाई भदौ ५ गते नै पारित गरी प्रतिनिधिसभामा प्रतिवेदन पेस गरिसकेको छ ।
माओवादी केन्द्रका प्रमुख सचेतक हितराज पाण्डेले भदौ १५ देखि ३० गतेसम्म पाँच दिन बैठक बस्ने कार्यक्रम तय भएको बताए । उनका अनुसार प्रतिनिधिसभा भदौ १८, १९, २५, ২৬ र २७ गते बैठक बस्नेछ । यससँगै लामो समयदेखि अल्झिएका विधेयकलाई संसद्ले यसै महिनाभित्रै निष्कर्षमा पुर्याउने तयारी गरेको छ ।
