रामेछाप । नेपाल कम्युनिष्ट पार्टी रामेछापले एक प्रेस विज्ञप्ति प्रकाशन गर्दै अहिलेको संसद विघटन संविधान, जनता र देशको हित विपरित भएको भन्दै खेद प्रकट गरेको छ ।
नेकपा रामेछापले निकालेको प्रेस विज्ञप्तीमा अकस्मात संसद विघटन गरि नयाँ जनादेशमा जान गरिएको यो कदम नेपालको संविधान र नेकपाका कार्यकर्ताको भावना विपरित रहेकाले यो प्रस्ताव खेदजनक रहेको जनाएको छ । नेकपा रामेछापका अध्यक्ष मयनकुमार मोक्तान र सचिव शान्तिप्रसाद पौडेलले हस्ताक्षर गरेको विज्ञप्तीमा दिगो संरचना, संघिय लोकतान्त्रिक गणतन्त्रको संस्थागत विकास, कोभिड १९ को व्यवस्थापन गरि नेकपालाई एकिकृत हुनुपर्नेमा अहिले जनताको मर्म र हित विपरित संसद विघटन गरिएको आरोप विज्ञप्तीमा उल्लेख छ ।
संविधानको रक्षा, लोकतान्त्रिक गणतन्त्रको संरक्षण गर्न पार्टी एकजुट गर्नुपर्नेमा त्यस्तो नगरि पार्टी भित्रको आन्तरिक विवाद मिलाउन नसकी संसद विघटन गर्नु दुर्भाग्यपूर्ण भएको जनाइएको छ । त्यस्तै स्थानिय तह, प्रदेश सरकार र संघिय सरकारको सहकार्य सहअस्तित्व र समन्वयमा जनताको समग्र समस्याहरुलाई सहज ढंगले नागरिकसम्म पुर्याउन पहल गर्नुपर्नेमा एकैपटक संसद विघटन तर्फ उन्मुख हुनु दुर्भाग्य भएको प्रेस विज्ञप्तीमा उल्लेख गरिएको छ ।
संसद विघटनको विरोध गर्न, संसद पुनः स्थापनाको लागि आवश्यक सघर्ष गर्न र संविधान विरोधी तत्वहरुलाई चलखेल गर्ने अवसर नदिनको लागि सबै नेकपाका कार्यकर्ताहरुलाई यसतर्फ लाग्न विज्ञप्ती मार्फत आव्हान गरिएको छ ।