२५ जेठ, काठमाडौं — संघीय संसदअन्तर्गत प्रतिनिधिसभाको बैठक आज दिउँसो १ बजेका लागि निर्धारण गरिएको छ। तर विपक्षी दलहरूको निरन्तर अवरोधका कारण बैठकले अझै पनि नियमित कार्यसूचीमा प्रवेश गर्न सकेको छैन।
‘भिजिट भिसा’ प्रकरणमा गृहमन्त्री रमेश लेखकको राजीनामाको माग गर्दै नेकपा माओवादी केन्द्र, राष्ट्रिय स्वतन्त्र पार्टी (रास्वपा) लगायतका विपक्षी दलहरूले संसद् अवरुद्ध गर्दै आएका छन्। दलहरूबीच अवरोध अन्त्यका लागि छलफल चलिरहेको भए पनि अहिलेसम्म कुनै ठोस सहमति जुट्न सकेको छैन।
आजको बैठकमा अवरोध हट्न सक्ने अवस्था बनेमा अर्थमन्त्री विष्णुप्रसाद पौडेलले आर्थिक वर्ष २०८२/८३ को राजस्व र व्ययको वार्षिक अनुमानमाथि सामान्य छलफल गरियोस् भन्ने प्रस्ताव पेस गर्ने सम्भावित कार्यसूची रहेको छ।
त्यस्तै, संघीय निजामती सेवा विधेयकसम्बन्धी समितिको प्रतिवेदन, २०८२ पेस गर्ने तयारी पनि रहेको छ, जुन राज्य व्यवस्था तथा सुशासन समितिका सभापति रामहरि खतिवडाले प्रस्तुत गर्ने कार्यक्रम छ।
संसद् अवरोधको समाधान खोज्न दलहरूबीच पछिल्ला दिनहरूमा केही चरणका वार्ता भए पनि आजको बैठक सञ्चालनको लागि निर्णायक सहमति जुट्नुपर्ने अवस्था छ।
