रामेछाप । समाजसेवी दिनेश राजशर्मा घिमिरेको उच्च रक्तचापका कारण बुधबार निधन भएको छ ।
कोरोना संक्रमणकाकारण ९ दिन अगाडि काठमाण्डौंको ओम अस्पतालमा उपचारका लागि भर्ना हुनु भएका घिमिरेको ८५ बर्षको उमेरमा उक्त संक्रमण निको भएपछि उच्च रक्तचापका कारण मृत्यु भएको हो । रामेछापको सामुदायिक विकासका लागि महत्वपूर्ण योगदान गरेका घिमिरे जिल्लाकै जेठो गैर सरकारी संस्था तामाकोसी सेवा समितिको संस्थापक अध्यक्ष समेत रहेका थिए ।
लामो सयम सरकारी सेवाको उच्च तहमा बसेर कामगरेका घिमिरेले जागिरे जिवनपछि गैर सरकारी संस्थाका माध्यमबाट समाज सेवामा सक्रिय रहेका थिए । रामेछाप जिल्लाकै अंग्रेजीमा पहिलो स्नाकोत्तर उत्तिर्ण घिमिरे पछिल्लो समय गुमनाम झैं बसेका थिए । घिमिरेको जिल्लाको सामुदायिक विकासका अतिरिक्त शिक्षा क्षेत्रको विकासका लागि समेत विशेष योगदान रहेको छ । रेडक्रस लगायतका संस्थाहरुको नेतृत्व गरिसकेका घिमिरे पछिल्ला दिनहरुमा जिल्ला स्थित विभिन्न संघ संस्थामा आवद्ध रहेका थिए ।
सरकारी जागीर छाडेर समाजसेवा संगसंगै राजनितिमा होमिएका घिमिरे ०४६ सालको परिवर्तन पछि राजनितिबाट पनि टाढा रहेका थिए । पंचायतकालमा गाउँपंञ्चायत देखी सांसद सम्मको निर्वाचनमा भाग लिएका घिमिरे आफ्नो चट्टानी अडानका कारण सधैं चर्चामा रहन्थे । उनको निधनमा जिल्लाका राजनैतिकदलका नेता तथा कार्यकर्ता शिक्षा सेवी, पत्रकार, नागरीक अगुवा तथा सर्वसाधारण नागरीकहरुले सामाजिक संजाल मार्फत शोक व्यक्त गर्दै जिल्लालाई नै अपुरणिय क्षति भएको जनाएका छन् ।
घिमिरेको निधनमा तामाकोसी सेवा समितिले शोक व्यक्त गरेको छ । संस्थापक अध्यक्षको निधनले संस्थालाई अपुरणिय क्षति पुगेको भन्दै रामेछापको सामुदायिक विकासका लागि उहाँको महत्वपूर्ण योगदान रहेको संस्थाका निर्देशक गोविन्द प्रसाद घिमिरेले बताए ।
