सल्यानमा जिल्ला प्रहरी कार्यालयको नयाँ भवन निर्माणका लागि जग खन्ने क्रममा ठुलो परिमाणमा बम र विस्फोटक पदार्थ फेला परेको छ। शारदा नगरपालिका–३ स्थित कार्यालय परिसरमा उत्खनन गर्दा ८२ थान सकेट बम, तीन थान सुतली बम र एउटा बोतल बम गरी जम्मा ८६ थान बम फेला परेका हुन्।
शंकास्पद वस्तु भेटिएपछि नेपाल प्रहरी र नेपाली सेनाले गरेको संयुक्त खानतलासीका क्रममा बमका अतिरिक्त सात थान रेडियो वेभ उपकरण, १० मिटर फायरिङ केबल र बम बनाउन प्रयोग हुने विभिन्न विस्फोटक सामग्री समेत बरामद गरिएको छ। प्रहरी नायब उपरीक्षक डा. हेमबहादुर केसीका अनुसार अहिले उक्त क्षेत्रमा आवश्यक सुरक्षा सतर्कता अपनाइएको छ।
