सिन्धुपाल्चोक — चीनसँग जोडिने तातोपानी–बाह्रबिसे सडक खण्डमा मंगलबार बोलेरो जिप भोटेकोसी नदीमा खस्दा चालक र सहचालक बेपत्ता भएका छन्।
जिल्ला प्रहरी कार्यालय सिन्धुपाल्चोकका अनुसार बा २१ च ७५४४ नम्बरको जिप तातोपानीबाट बाह्रबिसेतर्फ जाँदै गर्दा भोटेकोसी गाउँपालिका–४ हिन्दी नजिकै सडकबाट नदीमा खसेको हो। जिपमा सवार सर्लाही बरथहवा नगरपालिका–२ का २३ वर्षीय चालक राजेशकुमार कुसवाह र २५ वर्षीय सहचालक राम प्रवेश महत्तो बेपत्ता भएको प्रहरी निरीक्षक सुमेश पाण्डेले जानकारी दिए।
दुर्घटनापछि एक्स्काभेटरको सहयोगमा जिपलाई डोरीले तान्ने क्रममा एक पुरुषको शव नदीले बगाएको प्रहरीले जनाएको छ। अर्को शव पनि पहिले नै नदीले बगाएको हुनसक्ने अनुमान गरिएको छ। हाल प्रहरीले भोटेकोसी नदी आसपासमा खोजी कार्य तीव्र पारेको जनाएको छ।
