काठमाडौँः नेपाली कांग्रेसका महामन्त्रीद्वय गगन कुमार थापा र बिश्व प्रकाश शर्मा शर्माले नेपाल–भारत संयुक्त आयोगको समझदारी विपरीत लिपुलेक क्षेत्रमा भारतले एकतर्फी रुपमा सडक बनाएको भन्दै आपत्ति जनाएको छ । महामन्त्रीद्वय गगन कुमार थापा र विश्वप्रकाश शर्माले वक्तव्य जारी गर्दै सडक निर्माण तत्काल रोक्न माग गरेको छ । सडक निर्माण प्रकरणमा सरकारका तर्फबाट भने हालसम्म कुनै पनि औपचारिक विरोधको प्रक्रिया अघि बढाइएको छैन ।
महामन्त्रीको संयुक्त वक्तव्यमा लिपुलेक, लिम्पियाधुरा र कालापानी क्षेत्र नेपालको भएको उल्लेख गरिएको छ । साथै, दुई राष्ट्रबीचको सीमा सम्बन्धी प्रश्नको हल ऐतिहासिक तथ्यका आधारमा हुनुपर्ने महामन्त्रीद्धयको माग रहेको छ ।
वक्तव्य
नेपाल–भारत संयुक्त आयोगमा दुई देशबीचको सबै प्रश्नमा कूटनैतिक संवादबाट समाधानमा पुग्नेगरी भएको सहमति विपरीत लिपुलेकमा सडक निर्माण भनेर आएको बिषय गम्भीर छ, आपत्तिजनक छ र अविलम्ब यो रोकिनुपर्छ । भारतीय प्रधानमन्त्री नरेन्द्र मोदीले ‘लिपुलेक क्षेत्रमा भारत सरकारले सडक बनाइरहेको’ भनेर केहिदिनअघि एक कार्यक्रममा व्यक्त गर्नुभएको भनाइप्रति नेपाली कांग्रेसको ध्यानाकर्षण भएको छ । लिपुलेक, लिम्पियाधुरा र कालापानी नेपाली भूमि हो र यसका सम्बन्धमा नेपाली कांग्रेसले विगतदेखिनै संस्थागत रुपले आफ्नो धारणा र अडान स्पष्ट रुपमा राख्दै आएको छ ।
नेपाली कांग्रेसले विगतदेखिनै संस्थागत रुपले राख्दै आएको निम्न धारणा र अडानमा पार्टी प्रष्ट र दृढ रहेको व्यहोरा सार्वजनिक रुपले पुनः दोहो¥याउन चाहन्छौ ।
१) लिपुलेक, लिम्पियाधुरा र कालापानी नेपालको भू–भाग हो ।
२) नेपालको भोगाधिकार यी भूगोलमा कायम हुनुपर्दछ भन्ने बिषयमा नेपाली कांग्रेस प्रस्ट छ ।
३) कालापानीबाट भारतीय सैनिक फिर्ता हुनुपर्दछ ।
४) नेपालको संसदले सर्वदलीय एकता साथ संविधान संशोधनमार्फत पारित गरेको नेपालको नक्सा सुगौली सन्धि पछिको नेपाल थियो, हो र त्यसको कार्यान्वयन हुनुपर्छ भन्ने बिषय राजनैतिक दलहरू एवं नेपाल सरकार समेतको साझा अभिमत हो भन्ने बिषयमा नेपाली कांग्रेस प्रष्ट छ ।
५) दुई राष्ट्रबीचको सीमा सम्बन्धी कुनै पनि प्रश्नको हल ऐतिहासिक तथ्यका आधारमा हुनुपर्दछ । १८१६ को सुगौली सन्धिको दस्तावेज दुवै राष्ट्रको साझा स्वीकारोक्तिको तथ्य हो भन्नेमा हामी प्रस्ट छौँ ।
६) नेपाल–भारत संयुक्त आयोगमा दुई देशबीचको सबै प्रश्नमा कूटनैतिक संवादबाट समाधानमा पुग्नेगरी भएको सहमति विपरीत लिपुलेकमा सडक निर्माण भनेर आएको बिषय गम्भीर छ, आपत्तिजनक छ र अविलम्ब यो रोकिनुपर्छ ।
७) दुबै छिमेकी राष्ट्रसँग नेपालको पुरानो र ऐतिहासिक सम्बन्ध रहिआएको छ । यस अर्थमा सीमा सम्बन्धी कुनै पनि प्रश्नको हल ऐतिहासिक तथ्यका आधारमा उच्चस्तरीय कूटनैतिक माध्यमबाट खोजिनु पर्दछ भन्ने बिषयमा नेपाली कांग्रेस प्रस्ट छ
