हेटौंडा । हेटौंडा–६ हात्तिलेटमा अवस्थित गरिबी निवारण बचत तथा ऋण सहकारी संस्था लिमिटेडको सहकारी भवन बागमती प्रदेशका मुख्यमन्त्री इन्द्रबहादुर बानियाँले मंगलबार उद्घाटन गरेका छन् ।
उद्घाटन कार्यक्रममा मुख्यमन्त्री बानियाँले समुदायमा रहेको पुँजी परिचालनमार्फत सहकारी संस्थाले गरिबी निवारणमा महत्वपूर्ण योगदान पुर्याएको बताए । उनले पछिल्लो समय केही सहकारीका कारण नकारात्मक धारणा बने पनि समग्रमा सहकारी अभियानले आर्थिक र सामाजिक रूपान्तरणमा टेवा पुर्याएको स्पष्ट पारे । साथै, प्रदेश सरकार सहकारी क्षेत्रको प्रवर्द्धनमा सधैं सकारात्मक रहेको उनले दोहोर्याए ।
कार्यक्रम सहकारीका अध्यक्ष कृष्णप्रसाद सापकोटाको सभाध्यक्षतामा सम्पन्न भएको थियो । सो अवसरमा सहकारीको २५औं साधारणसभा, स्थापना दिवस, रजत जयन्ती, स्मारिका विमोचन तथा भवन उद्घाटन समेत गरिएको थियो । मुख्यमन्त्री बानियाँले संस्थाले प्रकाशन गरेको स्मारिका विमोचन पनि गरेका थिए ।
भवन निर्माणमा योगदान गर्ने हेटौंडा–६ वडा कार्यालय, संस्थापक अध्यक्ष शिवप्रसाद खनाल, प्रस्तावक अध्यक्ष रामकृष्ण तिवारी, पूर्व अध्यक्ष श्रीराम खतिवडा, निवर्तमान अध्यक्ष पुष्पराज पराजुली, ज्येष्ठ सदस्यहरू गोपालप्रसाद दुलाल, धनप्रसाद पुडासैनी, कुलप्रसाद दुलाल, चन्द्रप्रसाद खतिवडा, सानीकान्छी भुजेल लगायतलाई सम्मान गरिएको थियो ।
कार्यक्रममा वडा अध्यक्ष विष्णुबहादुर दाहाल, सहकारीका उपाध्यक्ष रिपुप्रसाद गौतम, कृष्णप्रसाद दुलाल लगायतले पनि मन्तव्य राखेका थिए ।
सो अवसरमा अध्यक्ष सापकोटाले आर्थिक वर्ष २०८२र०८३ को नीति तथा कार्यक्रम प्रस्तुत गरे भने सचिव शरदकुमार श्रेष्ठले वार्षिक प्रगति प्रतिवेदन र लेखा सुपरिवेक्षण समितिका संयोजक शिवप्रसाद गौतमले लेखा प्रतिवेदन पेश गरेका थिए ।
