मेरो प्रदेश डेक्स
मन्थली, भाद्र १५
रामेछाप सदरमुकाम मन्थलीमा १ सयभन्दा बढी मोतियाबिन्दुका बिरामीको शल्यक्रिया गरिएको छ । सामुदायिक विकास समाज मन्थलीको आयोजनामा शुक्रबार र शनिबार चलेको शिविरमा १ सय १३ जनाको सफल शल्यक्रिया गरिएको हो ।
आर्थिक अभाव र भौगोलिक कठिनाइका कारण मोतियाबिन्दुको शल्यक्रिया गर्न नसकी अन्धकार र कष्ठकर जीवन बिताइरहेकालाई शिविरले उज्यालो प्रदान गरेको समाजले जनाएको छ । मोतियाबिन्दुको कारण गुमेको दृष्टि फर्किने भएपछि शिविरमा सहभागीहरु निकै खुशी भएका थिए । रामेछाप नगरपालिका–८ का केदारनाथ घिमिरेले लामो समयदेखि आँखा धमिलो देख्ने समस्या निशूल्क शल्यक्रियापछि समाधान भएकोमा खुशी व्यक्त गरे ।
समाजका निर्देशक मिलन कुमार घिसिङले शिविरमा १ सय ११ जनाको मोतियाविन्दु शल्यक्रिया र ३ जनाको सानो अप्रेसन गरिएको जानकारी दिए । उनका अनुसार शिविरमा वरिष्ठ नेत्ररोग विशेषज्ञ सुषमा दुवालको नेतृत्वमा ११ सदस्यीय चिकित्सक टोलीले शल्यक्रिया गरेको हो ।
केही दिन अघि खाँडादेवी गाउँपालिकामा सम्पन्न आँखा शिविरबाट पहिचान भएका बिरामीसहित अन्य पालिकाका मोतियाबिन्दुका बिरामीलाई समेत शल्यक्रिया सेवा दिइएको हो । नेपाल आँखा कार्यक्रम, तिलगङ्गा आँखा प्रतिष्ठान, सामुदायिक सर्किजल आँखा केन्द्र रामेछापको ‘केयर ब्लाइन्डनेस प्रोजेक्ट’ तथा पीएसएफ लक्जेम्बर्ग र खाँडादेवी गाउँपालिकाको सहयोगमा शिविर आयोजना भएको सामुदायिक विकास समाज मन्थलीले जनाएको छ । शल्यक्रियाको पर्खाइमा तड्पीरहेका मोतियाबिन्दुका बिरामीहरुलाई शिविर वरदान सावित भएको र यस्ता शिविरहरु निरन्तर आयोजना हुनुपर्ने सहभागीहरुले माग गरेका छन् ।
