ओखलढुङ्गा । सगरमाथा आरोही ४६ जनालाई खिजीदेम्बा गाउँपालिकाले सम्मान गरेको छ । गाउँपालिका भित्रका सगरमाथा आरोहीलाई पालिकाले काठमाडौँमा एक कार्यक्रमको आयोजना गरेर सम्मान गरेको हो । ‘स्वावलम्बी, कीर्तिमानी र कर्मशीलहरूलाई खिजीदेम्बाको साथ: साहसिक पदयात्रा मार्फत पर्यटन प्रवर्द्धनमा मिलाऔँ हातमा हात’ भन्ने उद्घोष सहित गाउँपालिकाले सम्मान गरेको हो । पालिकाले पर्यटन मन्त्री बद्रीप्रसाद पाण्डेको हातबाट४६ जना सगरमाथा आरोहीहरूलाई सम्मान गरेको हो ।
सन् २००१ मा खिजीदेम्बा गाउँपालिका ९ का दोर्जी शेर्पाले ओखलढुङ्गा जिल्लाबाटै पहिलो पटक सगरमाथा आरोहण गरेका थिए । त्यसयता खिजीदेम्बाबाट मात्रै हालसम्म ४६ जना आरोहीले सगरमाथा आरोहण गरेका छन् । खिजीदेम्बाकै जाङ्बु शेर्पाले २२ औँ पटक सम्म सगरमाथा चढिसकेका छन् ।
खिजीदेम्बा पर्यटनको प्रचुर सम्भावना भएको पालिका रहेको र गाउँपालिकाका अधिकांश शेर्पा समुदायका नागरिक पर्यटन व्यवसायमा संलग्न रहेकाले स्थानीय सरकारले अभिभावकत्व प्रदान गरेको अध्यक्ष गम्बु शेर्पाको भनाई छ । राज्यको तर्फबाट अपेक्षित सहयोग नपाएको अवस्थामा पहिलो पटक आफ्नो गाउँपालिकाले सम्मान गरेर हौसला दिएको आरोहीहरूले बताएका छन् । पालिकाको सम्मान ग्रहण गर्न पाउँदा पहिलो पटक सगरमाथा आरोहण गर्दा जतिकै खुसी मिलेको ओखलढुङ्गाकै पहिलो महिला सगरमाथा आरोही माया शेर्पाले बताइन् । आरोही र पर्यटन व्यवसायीले पर्यटनका क्षेत्रमा सरकारले ठोस् कार्यक्रम ल्याउनुपर्ने माग गरेका छन् । कार्यक्रममा संसद्को राज्य व्यवस्था तथा सुशासन समिति सभापति रामहरि खतिवडा, संविधानसभा सदस्य यज्ञराज सुनुवार, प्रदेश सांसद प्रदीप सुनुवारले ओखलढुङ्गाको पर्यटन विकासका लागि पहल गरिरहेको बताएका थिए । खिजीदेम्बाले आरोहीको सम्मान र पर्यटन सद्भावना दूत घोषणा गरेर रचनात्मक काम गरेको भन्दै नेताहरूले पालिकाको प्रशंसा समेत गरेका छन् ।
खिजीदेम्बाका सगरमाथा आरोहीलाई सम्मान गर्दै पर्यटन मन्त्री बद्रीप्रसाद पाण्डेले पर्यटन विकासलाई सरकारले प्राथमिकतामा राखेर काम गरिरहेको बताए । खिजी चण्डेश्वर एयरपोर्ट सञ्चालन देखि ओखलढुङ्गाको पर्यटन विकासका लागि योजना ल्याउन आग्रह गर्दै मन्त्री पाण्डेले पर्वतारोहीको योगदानलाई संस्थागत गर्न सरकारले योजना बनाउने प्रतिबद्धता जनाए ।
ओखलढुङ्गाको दुर्गम गाउँ खिजीदेम्बा पर्यटनको प्रचुर सम्भावना भएको पालिका हो । नेपालका घुम्न लायक सय गन्तव्य सूचिमा पर्ने थोलेदेम्बासहितका दर्जनौँ पर्यटकीय क्षेत्रको विकास र प्रवर्द्धनमा पालिका जुटेको छ ।
