रामेछाप । जिल्ला बिपत ब्यवस्थापन समिती रामेछापले सडक दुर्घटना र उद्धार सम्बन्धी कृत्रिम अभ्यास गरेका छन् । समुदाय स्तरमा नागरिक सचेत हुन पर्ने भन्दै जिल्ला बिपत व्यवस्थापन समितिले बिभिन्न खाले अभ्यास गरेर नागरिकलाई सचेत गराउनका साथै घट्ना घटेमा उद्धारको बिषयमा जानकारी गराउदै आएका छन् ।
जिल्ला बिपत ब्यवस्थापन समितिको आयोजनामा नेपाली सेना, सशस्त्र प्रहरी बल , जिल्ला प्रहरी कार्यलय र जिल्ला रेडक्रस सोसाइटी रामेछापको सहयोगमा आयोजना गरेको कार्यक्रममा रामेछापको सडकको अवस्था र दुर्घटना को बारेमा जानकारी गराइएको थियो ।
जिल्लामा आर्थिक वर्ष २०७८/०७९ मा ३३ वटा सवारी दुर्घटना भएको र उक्त दुर्घटना बाट २२ जनाले ज्यान गुमाएको जिल्ला ट्र«ाफिक कार्यालय रामेछापका प्रमुख चन्द्र बहादुर श्रेष्ठले जानकारी दिए । उनले सोहि कार्यक्रममा बोल्दै सवारी दुघटना बाटमात्र ९८ जना घाइते भएको जिल्ला प्रहरी कार्यालय रामेछापको तथ्याङ्कमा रहेको बताए । दुई नगरपालिका र ६ गाउँपालिकाको ६४ वटा वडा रहेको रामेछापको ग्रामिण भेगका अधिकांश सडक कच्ची छन् । त्यसैले रामेछापका सडक दुर्घटनामा परी वर्षेनी धेरे मानिसले ज्यान गुमाइरहेका छन् ।
जिल्लामा हुने यस्ता सडक दुर्घटनाको घटनालाई मध्यनजर गरी सडक दुर्घटना सम्बन्धी कृत्रिम अभ्यास गरिएको छ । जिल्ला विपद व्यवस्थापन समिति रामेछापको आयोजनामा जिल्लाको पुरानो सदरमुकाम रामेछापको भंगेरीमा शुक्रबार उक्त अभ्यास गरिएको हो । अभ्यासका क्रममा रामेछाप नगरपालिका–८ भंगेरीमा यात्रु बहाक बस दुर्घटना हुन्छ । दुर्घटनामा परी मृत्यु भएकाको शव र घाइतेहरूलाई सुरक्षाकर्मी, स्वास्थ्यकर्मीहरूको टोलीले उद्धार गरि उपचार तथा आवश्यक व्यवस्थापनबारे अभ्यास गरिएको थियो ।
उद्धार टोलीमा नेपाली सेना, नेपाल प्रहरी र सशस्त्र प्रहरीका जवानहरू सम्मिलित थिए । रामेछापका प्रमुख जिल्ला अधिकारी दीपककुमार पहाडीले यदि कुनै दुर्घटना भइहाल्यो भने सुरक्षा फौजको टोलीले सजिलै उद्धार गर्न सक्ने बताउनुभयो । विपद कुनै पनि समयमा आउन सक्ने भएकाले सुरक्षाकर्मी तथा उद्धारमा संलग्न सुरक्षा निकायलाई तयारी अवस्थामा राख्न पूर्व अभ्यास गराइएको उहाँले बताउनुभयो ।
‘जुनसुकै बेला सडक दुर्घटना, आगलागी, बाढी पहिरो जस्ता विपद्का घटनाहरू हुन्छन्, यस्ता घटनामा परेकालाई उद्धार, उपचार लगायतका व्यवस्थापनका लागि सम्बन्धित निकायलाई तयारी अवस्थामा राख्न र नागरिकलाई पनि सचेत गराउनका लागि यस्ता कृत्रिम नमूना अभ्यास आवश्यक छ’, उहाँले भन्नुभयो । जिल्लामा विगतका समयमा सडक दुर्घटना, आगलागी, बाढी पहिरो जस्ता विपद्का घटनाहरू भएकाले त्यस्ता घटनाहरूलाई ध्यानमा राखेर यो अभ्यास गरिएको उहाँले बताउनुभयो ।
रामेछाप नगरपालिका प्रमुख लवश्री न्यौपानेले जुनसुकै समयमा विपद्का घटना हुने भएकाले सम्बन्धीत निकाय सदैव तयारी अवस्थामा रहनुपर्ने बताउनुभयो । कुनै पनि विपद्का घटना थाहा दिएर तथा बाजा बजाएर आउदैनन्, तर सडक दुर्घटना भने लापरबाहीले नै बढी हुने गरेका छन्, त्यसैले यस्ता अभ्यासको ठुलो महत्व छ उहाँले भन्नुभयो ।
