काठमाण्डौं । नेपाल सरकारले फेसबुक, ह्वाट्सएप, इन्स्टाग्राम लगायतका सामाजिक सञ्जाल बन्द गर्ने निर्णय गरेसँगै गण्डकी प्रदेशको व्यापार व्यवसाय र पर्यटन क्षेत्रमा ठुलो असर परेको व्यवसायीहरूले बताएका छन्। पोखराका व्यवसायीहरूका अनुसार सामाजिक सञ्जालमा आधारित सेवा र कारोबार ठप्प भएपछि पर्यटकहरूले बुकिङ गर्न छाडेका छन् भने पहिले गरेका बुकिङहरू रद्ध गर्न थालेका छन्।
अन्तर्राष्ट्रिय नेपाली युवा उद्यमी महासंघ (फिने) गण्डकीले सामाजिक सञ्जाल बन्दले व्यापार व्यवसायमा ठूलो प्रभाव पारेको र लाखौं नागरिकको दैनिकी तथा रोजगारीमा अप्ठेरो सिर्जना भएको भन्दै कास्कीका प्रमुख जिल्ला अधिकारी रुद्रादेवी शर्मामार्फत नेपाल सरकारको ध्यानाकर्षण गराएको छ। महासंघका अध्यक्ष अमरजंग गुरुङ र महासचिव चिरञ्जीवी गौतमको नेतृत्वमा बुझाइएको ज्ञापनपत्रमा भनिएको छ कि “सामाजिक सञ्जालमा आधारित सयौं आम्दानीका स्रोतहरू प्रभावित भएका छन्। यसले लाखौं नागरिकको दैनिकी, रोजगार र रोजगारीमाथि प्रत्यक्ष असर पारेको छ। घुम्न आउने पर्यटकहरूले बुकिङ गर्न छाडेका छन् भने पहिलेका बुकिङ रद्ध गर्न थालेका छन्।”
महासंघले विश्वभर रहेका व्यावसायिक संस्थाहरू बीचको सम्पर्कमा समेत असर परेको बताएको छ। सामाजिक सञ्जाललाई व्यवस्थित नियमन गर्न कानुन निर्माण आवश्यक रहेको स्वीकार गर्दै पनि, पर्याप्त कानुनी आधार र कुटनीतिक प्रयासबिना बन्द गर्ने निर्णयप्रति असहमति जनाएको छ। महासचिव गौतमले भने, “नागरिकको अभिव्यक्ति स्वतन्त्रता र सूचनाको हक प्रभावित गर्नु कानुनी शासन र लोकतान्त्रिक मूल्य विपरीत छ। सरकारले पुरानो २०६३ सालको कानुनको आधारमा सामाजिक सञ्जाल बन्द गर्ने निर्देशिका जारी गर्नु व्यवसायी र आम नागरिकको पक्षमा होइन।”
फिने गण्डकीका प्रवक्ता कृष्ण आचार्यले बताए, “सिजन सुरु हुन लाग्दा सामाजिक सञ्जाल बन्द भएपछि व्यावसायिक सम्बन्ध नै टुटेको छ। फेसबुक र ह्वाट्सएपबाट हाम्रो अधिकतम सम्पर्क र व्यवसायिक कुराकानी हुन्थ्यो, अहिले त्यो सम्भव छैन। पर्यटकले सामाजिक सञ्जाल नचल्ने देशमा किन आउने भन्ने प्रश्न गर्न थालेका छन्।”
व्यवसायीहरू सरकारको निर्णयले गण्डकी प्रदेशको पर्यटन उद्योग, होटल, ट्राभल एजेन्सी र विभिन्न सेवा क्षेत्रमा ठुलो नोक्सानी पुगेको बताउँदै तत्काल सुधार र सामाजिक सञ्जाल सञ्चालनको विकल्पसहित नियमन प्रक्रिया अघि बढाउन सरकारसँग आग्रह गरेका छन्।
