चित्रमाया श्रेष्ठ ।
रामेछाप । सदरमुकाम मन्थलीमा रहेका अस्पतालहरुमा रगत अभाब हुँदा उपचार लिन आउने सेवाग्राहीहरु प्रभावित भएपछि एकदिने रक्तदान कार्यक्रम आयोजना गरिएको छ ।
जिल्लाकै ठूलो सहकारी संस्था नवजागरण बचत तथा ऋण सहकारी संस्था (युवा उप–समिति)को आयोजना तथा नेपाल रेडक्रस सोसाइटी जिल्ला शाखा रामेछापको प्राविधिक सहयोगमा रक्तदान कार्यक्रम संचालन गरेको हो । रक्तदान कार्यक्रममा विभिन्न ब्लड समुहका २१ जना व्यक्तिले रक्तदान गरेका थिए ।
रक्तदान कार्यक्रमबाट जम्मा गरिएको ब्लड मन्थलीमा रहेका तामाकोशी अस्पताल, रामेछाप सामुदायिक अस्पताल र मन्थली अस्पतालमा उपचार लिन आएका विरामीहरुलाई उपलव्ध गराउने गरि नेपाल रेडक्रस सोसाइटीमा जिम्मा दिइएको नवजागरण बचत तथा ऋण सहकारी संस्था (युवा उप–समिति)का संयोजक सुरेश उदासले जानकारी दिए ।
उनले भने– मन्थलीमा रहेका अस्पतालहरुमा रगत अभाव हुँदा विरामीहरुले सहज ढंगले सेवा लिन समस्या भएको भन्ने गुनासो यत्रतत्र सुनिएकाले रगत अभावमा कुनै पनि विरामीहरु उपचारवाट वञ्चित हुनु नपरोस् भन्ने उद्धेश्यले रक्तदान कार्यक्रमको आयोजना गरिएको हो । अस्पतालहरुलाई आवश्यक परेको बखत संस्थाले आगामी दिनमा पनि यस्ता रचनामत्क कार्यक्रमहरु संचालन गर्ने पनि संयोजक उदासले बताए ।
आयोजक संस्था नवजागरण बचत तथा ऋण सहकारी संस्थाले समयसमयमा विद्यार्थीहरुलाई छात्रबृत्ति वितरण, सामुदायिक विद्यालय र पत्रकार महासंघलाई कम्प्युटर वितरण, असक्त, अपाङ्ग लगाएतलाई सहयोग, आगलागी, भुकम्प पिडीत, बाढिपहिरो लगाएतका घटनामा पिडीत भएका आफ्ना शेयर सदस्यहरुलाई सहयोग गर्दै आएको छ ।
