रामेछाप । जिल्ला सदरमुकाम मन्थलीमा रहेको नेवार समुदाय आफ्नो रीतिरिवाज र संस्कृति संरक्षणमा जुटेका छन् । नेवार समुदायको संस्कार, संस्कृति ,रीतिरिवाजको संरक्षण गर्ने उद्देश्य सहित सदरमुकाम मन्थलीमा रहेको नेवार समुदाय एकजुट भएर लागेका छन् । यही भाद्र महिनामा हुने गाईजात्रा, रोपाई जात्रा, कृष्ण अष्टमी, लाखे मार्ने नाच लगायत पर्वलाई लक्षित गरी मन्थलीका नेवार समुदाय विशेष तयारीमा जुटेका छन् । जिल्लाको विभिन्न स्थानमा यो पर्व नेवार समुदायले मनाउने गरेको भए पनि मन्थलीमा भने पहिलो पटक मनाउन लागिपरेका छन् । जनैपुर्णिमा देखी कृष्ण जन्माष्टमीको भोलिपल्ट सम्म मनाइने जात्रालाई गाईजात्रा तथा हिले जात्रा भन्ने गरिन्छ । यस अवधिमा विभिन्न जात्राहरू निकाल्ने नेवार समुदायमा प्रचलन छ ।
नेवा खल रामेछापका अध्यक्ष शेखरमान श्रेष्ठले भने“ हाम्रो नेवार समुदायको पर्व जिल्ला सदरमुकाममा कुनै पनि नहुँदा संस्कार, संस्कृति ,रीतिरिवाजको अन्त्य हुने सम्भावना बढ्दै गएपछि यो वर्ष बाट हामी नेवा खल ,मिसा पुच,नेवा देय दवू मिलेर हाम्रो नेवा समुदायको भाद्र महिनामा पर्ने विभिन्न पर्व गाईजात्रा, रोपाई जात्रा, कृष्ण अष्टमी, लाखे मार्ने नाच मन्थली बजारमा निकाल्ने तयारी गरेका छौँ । हाम्रो समुदायको पर्व नेपालको पहिचान हो , हामीले यसको जर्गेना गर्न पर्छ । यदि जगेर्ना गर्न सकेनौँ भने हाम्रो अस्तित्व मेटिन सक्छ । जब नेवार समुदायको अस्तित्व हराउँछ । नेपालको विश्वमा अस्तित्व हराउँछ ।
यो वर्ष सदरमुकाम मन्थलीमा गाईजात्रा भाद्र १४ गते दिनको ११ बजे, रोपाई जात्रा भाद्र १६ गते दिनको ११ बजे , कृष्ण अष्टमी भाद्र २० गते बिहान ९ बजे कृष्णको रथ यात्रा गरी मनाउने र भाद्र २१ गते लाखे मार्ने नाच निकाल्ने तयारी भएको अध्यक्ष श्रेष्ठले बताए । नेवारी भाषा तथा संस्कृतिको संरक्षणका लागी एक सेट नेवारी बाजा मन्थली नगरपालिकाले उपलब्ध गराएको भन्दै अध्यक्ष श्रेष्ठले मन्थली नगरपालिकालाई धन्यवाद समेत दिएका छन् ।
