रामेछाप । नेपाल रेडक्रस सोसाइटी जिल्ला शाखा रामेछापले जिल्लका तिन वडा गाउँपालिकाका नागरिकलाई निःशुल्क रकगत उपलब्ध गराउने भएको छ । उमाकुण्ड गाउँपालिका, खाँडादेवी गाउँपालिका र लिखतामाकोशी गाउँपालिकाका नागरिकलाई निःशुल्क रगत उपलब्ध गराउने गरी सम्बन्धित गाउँपालिका र नेपाल रेडक्रस सोसाइटी रामेछाप जिल्ला शाखाबिच सम्झौता समेत भएको हो । केही दिन अघि नेपाल रेडक्रस सोसाइटी केन्द्रीय कार्यालयमा भएको आन्तरिक सम्झौता पत्रमा नेपाल रेडक्रस सोसाइटी केन्द्रका तर्फबाट महामन्त्री भूपतिलाल श्रेष्ठ र नेपाल रेडक्रस सोसाइटी रामेछाप शाखाको तर्फबाट मन्त्री दुर्गाबहादुर श्रेष्ठले हस्ताक्षर भएको थियो सोही अनुसार रामेछाप शाखाले गाउँपालिका सँग सम्झौता गरेको हो । रेडक्रसले अन्य जिल्ला शाखा र केन्द्रीय रक्तसञ्चार सेवा बिच पनि सम्झौता गरेको छ ।
रामेछापका सबै स्थानीय तहमा निःशुल्क रूपमा रक्त सेवा प्रदान गर्दै जाने योजना अनुरूप अहिले तीन वटा पालिकामा यो कामको सुरुवात गरिएको रेडक्रस रामेछापका मन्त्री दुर्गाबहादुर श्रेष्ठले बताएका छन् । ‘बिरामीलाई निःशुल्क रूपमा रगत उपलब्ध गराउनुपर्छ भन्ने मान्यताका साथ अभियान सुरु भएको छ, अब यो अभियान अन्तरगत जिल्लामा रहेको दुई वटा नगरपालिका र ६ वटै गाउँपालिकामा निःशुल्क रगत सेवा उपलब्ध गराउनु छ’, उहाँले भन्नुभयो । अहिले नेपाल रेडक्रस सोसाइटी रामेछाप शाखाले विभिन्न अस्पतालमा उपचाररत बिरामीहरूलाई रगत अभाव हुँदा शाखा बाटै बिरामीलाई रगत उपलब्ध गराउँदै आएको छ ।
