रौतहट । रौतहटको गरूडा नगरपालिकास्थित एक घरमा भण्डारण गरिएको ठूलो परिमाणको चिनी छापा मार्दा हराएको देखिएपछि सशस्त्र प्रहरीका वरिष्ठ अधिकारीहरू नै छानबिनमा तानिएका छन् ।
साउन २९ गते बिहान सशस्त्र प्रहरी हेडक्वार्टरले प्राप्त गरेको सूचनाअनुसार उक्त घरमा करिब ७ सय बोरा चिनी रहेको देखिएको थियो । तर छापा मारिएको चिनी भन्सारमा बुझाउँदा जम्मा १०६ बोरा मात्रै विवरण पुगेपछि गम्भीर प्रश्न उठेको छ ।
घटनापछि सशस्त्र प्रहरीका प्रहरी उपरीक्षक (एसपी) सन्तोष बस्नेत, डिएसपी अमर लामा र डिएसपी राजेन्द्रबहादुर बस्नेतलाई हेडक्वार्टर तानेर छानबिन सुरु गरिएको सशस्त्र प्रहरी सहप्रवक्ता डिएसपी शैलेन्द्र थापाले जानकारी दिए । “भिडिओमा देखिएको परिमाण र भन्सारमा बुझाइएको चिनीबीच गडबडी देखिएकाले कानुन महाशाखाले अनुसन्धान गरिरहेको छ,” उनले भने ।
घटनापछि डिएसपी राजेन्द्रबहादुरसहित १७ जना सशस्त्र प्रहरीलाई मधेस प्रदेशको छिन्नामस्ता बाहिनीमा तानेर बयान लिइएको छ । डिएसपी अमर लामालाई भने सुरुमा नै हेडक्वार्टर तानिएको थियो ।
स्रोतका अनुसार, छापा मार्न खटिएका सशस्त्र प्रहरी निरीक्षकलाई समेत निगरानीमा राखिएको छ । हराएको चिनी तस्करीसँग जोडिएको आशंका गरिएको छ तर संलग्नता कसको हो भन्नेबारे अझै स्पष्ट भएको छैन । यो घटनापछि सशस्त्र प्रहरी संगठनमै ठूलो हलचल मच्चिएको छ ।
