फागुन २१ गते सम्पन्न प्रतिनिधिसभा सदस्य निर्वाचनको प्रारम्भिक मतपरिणामले देशको राजनीतिक परिदृश्यमा नयाँ मोड देखाएको छ। हालसम्मको मतगणनाअनुसार राष्ट्रिय स्वतन्त्र पार्टी (रास्वपा) ले देशभर प्रभावशाली प्रदर्शन गर्दै अग्रता लिइरहेको छ। पछिल्लो विवरणअनुसार रास्वपाले ३६ स्थानमा जित हासिल गरिसकेको छ।
यस परिणामले लामो समयदेखि राजनीति गर्दै आएका परम्परागत दलहरूलाई चुनौती दिएको देखिन्छ। नेपाली कांग्रेस हालसम्म ६ सिट जितेर दोस्रो स्थानमा सीमित भएको छ।
प्राप्त विवरणअनुसार कांग्रेसका तर्फबाट डोटी–१ मा भरतबहादुर खड्काले १४,८९७ मतान्तरले विजय हासिल गरेका छन्। दैलेख–१ मा बासना थापा १२,३७२ मतान्तरले विजयी भएका छन् भने तेह्रथुम–१ मा सन्तोष सुब्बाले ११,५६१ मतान्तरले जित निकालेका छन्।
यसैगरी रसुवा–१ मा मोहन आचार्य १०,६५६ मतान्तरले विजयी बनेका छन्। मुस्ताङ–१ मा योगेश गौचन थकालीले ३,३०७ मतान्तरले जीत हात पारेका छन् भने मनाङ–१ मा टेकबहादुर गुरुङ २,४१५ मतले विजयी भएका छन्।
हालसम्मको मतगणनाले रास्वपालाई थप बलियो बनाइरहेको देखिन्छ। पार्टीले ८४ निर्वाचन क्षेत्रमा अग्रता कायम गरेको छ। नेपाली कांग्रेसले १० स्थानमा अग्रता बनाएको छ भने नेकपा एमालेले २ सिट जित्नुका साथै ९ स्थानमा अग्रता लिइरहेको छ। त्यसैगरी नेकपाले २ सिट जित्दै १० स्थानमा अग्रता कायम गरेको छ।
यसबीच झापा–५ मा रोचक प्रतिस्पर्धा देखिएको छ। उक्त क्षेत्रमा रास्वपाका वरिष्ठ नेता बालेन शाहले एमाले अध्यक्ष केपी शर्मा ओलीभन्दा झन्डै ३५ हजार मतले अग्रता बनाएका छन्।
हालसम्मको मतपरिणामले रास्वपालाई राष्ट्रिय राजनीतिमा बलियो शक्तिका रूपमा उभ्याएको देखिन्छ। यसले परम्परागत दलहरूको प्रभावमा चुनौती खडा गर्दै नयाँ राजनीतिक शक्तिप्रति जनताको आकर्षण बढिरहेको संकेत दिएको छ।
