निर्वाचनअघि ‘सार्वजनिक पद सम्हाल्नुअघि नै सम्पत्ति विवरण सार्वजनिक गर्ने’ बाचा गरेको सत्तारुढ दल राष्ट्रिय स्वतन्त्र पार्टी (रास्वपा) सरकारमा पुगेको १२ दिन बित्दा पनि आफ्नो प्रतिवद्धतामा मौन देखिएको छ। बाचापत्रको १६ औँ बुँदामा पदमा जानुअघि र कार्यकाल सकिएपछि सम्पत्तिको स्वतन्त्र लेखापरीक्षण गराएर जनतालाई जानकारी दिने उल्लेख भए पनि प्रधानमन्त्री बालेन्द्र शाह र रास्वपाका मन्त्रीहरूको सम्पत्ति विवरण मङ्गलवार साँझसम्म गोप्य नै राखिएको छ।
प्रधानमन्त्री तथा मन्त्रिपरिषद् कार्यालयको वेबसाइटमा मन्त्रीहरूको सम्पत्ति विवरणसम्बन्धी खण्ड अझै रित्तो छ भने प्रतिनिधिसभामा रहेका रास्वपाका १८२ सांसदहरूले पनि हालसम्म आफ्नो सम्पत्ति सार्वजनिक गरेका छैनन्। कानुनतः पद सम्हालेको ६० दिनभित्र विवरण बुझाउनुपर्ने व्यवस्था भए तापनि ‘नयाँपन’ को नारा दिएको रास्वपाले पद बहालीअघि नै सार्वजनिक गर्ने आफ्नै बाचा बिर्सिएको भन्दै आलोचना सुरु भएको छ। २०४६ सालपछि गिरिजाप्रसाद कोइराला नेतृत्वको सरकारले १५ दिनभित्र विवरण सार्वजनिक गर्ने परम्परा सुरु गरे पनि पछिल्ला वर्षहरूमा यो केवल नैतिकताको विषयमा खुम्चिएको छ। पुराना दलको विकल्प भन्दै आएको रास्वपाले समेत आफ्नै ‘बाचा’ कार्यान्वयनमा ढिलाइ गर्दा पारदर्शितामाथि प्रश्न उठेको छ।
