काठमाडौँ । राष्ट्रिय स्वतन्त्र पार्टी (रास्वपा) र राष्ट्रिय प्रजातन्त्र पार्टी (राप्रपा)ले बिहीबारको प्रतिनिधिसभा बैठक बहिस्कार गरेका छन्। भिजिट भिसा प्रकरणमा संसदीय विशेष छानबिन समिति वा उच्चस्तरीय न्यायिक छानबिन नहुँदा दुवै दलले बैठकमा सहभागी नहुने निर्णय लिएका हुन्।
सभामुख देवराज घिमिरेले बैठक सुरु भएको घोषणा गरेलगत्तै रास्वपा र राप्रपाका सांसदहरू उठेर विरोध जनाएका थिए। त्यस क्रममा सभामुखले रास्वपाकी सचेतक निशा डाँगीलाई बोल्ने अवसर दिएका थिए। डाँगीले लोकतन्त्रको नाममा सरकार दोहोरो मापदण्डमा उभिएको आरोप लगाइन्।
त्यसपछि राप्रपाकी सांसद अनिसा नेपालीलाई पनि बोल्ने समय दिइयो। उनले भारत–चीनबीच लिपुलेकलाई समेटेर भएको सहमतिप्रति आपत्ति जनाउँदै भिजिट भिसा प्रकरणमा संसदीय छानबिन समिति गठन नभएसम्म सदन बहिस्कार गर्ने चेतावनी दिइन्।
दुवै दलका सांसदहरूले धारणा राखेपछि उनीहरू बैठक बहिष्कार गर्दै सदन कक्षबाट बाहिरिएका थिए। भिजिट भिसा सेटिङ प्रकरणमा संसदीय विशेष छानबिन समिति वा न्यायिक छानबिन आयोग गठन गर्नुपर्ने मागसहित रास्वपा र राप्रपाले जेठ १३ गतेदेखि निरन्तर विरोध गर्दै आएका छन्।
