काठमाडौँ — राष्ट्रपति रामचन्द्र पौडेलको सहजीकरणमा प्रधानमन्त्री सुशीला कार्की र देशका शीर्ष तीन दलका नेताबीच पहिलो पटक प्रत्यक्ष भेटवार्ता भएको छ । जेन–जी आन्दोलनपछि प्रधानमन्त्री कार्कीले नेपाली कांग्रेस, नेकपा एमाले र नेकपा (माओवादी केन्द्र) का शीर्ष नेताहरूसँग सामूहिक छलफल गरेकी हुन् ।
शीतल निवासमा जारी छलफलमा राष्ट्रपति पौडेल र प्रधानमन्त्री कार्कीसहित कांग्रेस सभापति शेरबहादुर देउवा, नेकपा एमालेका अध्यक्ष केपी शर्मा ओली तथा नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सहभागी भएका छन् । बैठकका औपचारिक एजेन्डा सार्वजनिक नगरिए पनि समसामयिक राजनीतिक परिस्थितिबारे छलफल भएको बताइएको छ ।
प्रधानमन्त्री कार्की नेतृत्वको जेन–जी सरकार गठन भएको करिब तीन महिनापछि शीर्ष राजनीतिक नेतृत्व एकै ठाउँमा भेला भएको यो पहिलो घट्ना हो । प्रधानमन्त्री नियुक्तिपछि शीर्ष नेताहरूसँग प्रत्यक्ष संवाद नहुँदा राजनीतिक संवादहीनता बढ्दै गएको भन्दै चौतर्फी दबाबसमेत बढिरहेको थियो ।
विशेषगरी आगामी निर्वाचनको तयारी सुरु भइरहेका बेला प्रमुख दलका शीर्ष नेतासँग छलफल गर्नुपर्ने आवश्यकता महसुस भइरहेकै समयमा राष्ट्रपतिको पहलमा यो भेटवार्ता भएको हो । यसले लामो समयदेखि देखिएको संवादको अभाव अन्त्य भएको संकेत गरेको विश्लेषण गरिएको छ ।
कांग्रेस र एमालेका बहुमत निवर्तमान सांसदहरूले प्रतिनिधिसभा पुनस्र्थापनाको माग गर्दै सर्वोच्च अदालतमा रिट दायर गरेको संवेदनशील घडीमा राष्ट्रपति पौडेलले प्रधानमन्त्रीसहित तीन दलका शीर्ष नेतालाई एकै ठाउँमा राखेर छलफल गराउनुलाई राजनीतिक रूपमा अर्थपूर्ण रूपमा हेरिएको छ । छलफलबाट राजनीतिक गतिरोध समाधान र आपसी समझदारीतर्फ सकारात्मक सन्देश जाने अपेक्षा गरिएको छ ।