रामेछाप, मन्थली । प्रेस सेन्टर नेपाल, बागमती प्रदेशको आयोजनामा तथा बागमती प्रदेश सरकार अन्तर्गत आन्तरिक मामिला तथा कानुन मन्त्रालयको सहयोगमा रामेछापको सदरमुकाम मन्थलीमा ‘वर्तमान अवस्थामा सञ्चार माध्यमको भूमिका’ विषयक अन्तरक्रिया कार्यक्रम सम्पन्न भएको छ।
कार्यक्रमको उद्घाटन जिल्ला समन्वय समिति रामेछापका उपप्रमुख प्रेमबहादुर खड्काले गर्नुभयो। उद्घाटन सत्रमा बोल्दै उपप्रमुख खड्काले पत्रकारिता क्षेत्रमा रहेका विविध चुनौती र अवसरहरूबारे प्रकाश पार्नुभयो। उहाँले डिजिटल युगमा सूचनाको प्रवाह तीव्र भए तापनि गलत सूचना र भ्रामक प्रचारको जोखिमसमेत बढिरहेको उल्लेख गर्दै पत्रकारिता क्षेत्रलाई मर्यादित, व्यवस्थित र उत्तरदायी बनाउन स्थानीय, प्रदेश र सङ्घीय सरकारबीच समन्वय र सहकार्य अत्यावश्यक रहेको धारणा व्यक्त गर्नुभयो।
उहाँले पत्रकारिता सुदृढ बनाउन नीतिगत स्पष्टता, नियमित तालिम, पर्याप्त स्रोत साधन र संरचनात्मक सहयोग आवश्यक रहेकोमा जोड दिनुभयो।
कार्यक्रममा सहभागी सञ्चारकर्मी तथा सरोकारवालाहरूले पनि आ–आफ्ना धारणा राखेका थिए। उनीहरूले स्थानीय तहमा सूचना पहुँचको अभाव, स्रोत साधनको कमी, र क्षमता अभिवृद्धिको अभावले जिम्मेवार पत्रकारिता गर्न कठिन भइरहेको गुनासो गरे। साथै, वर्तमान अवस्थामा पत्रकारिता क्षेत्रमा आत्ममूल्यांकन, नयाँ सोच र कार्यशैलीको आवश्यकता रहेको उल्लेख गर्दै सञ्चारकर्मीहरूले पत्रकारितालाई जनताको पक्षमा बलियो बनाउनेतर्फ जोड दिनुपर्ने बताए।
केही सहभागीहरूले पत्रकारहरू जनताको सरोकार भन्दा पनि व्यक्तिगत लाभ र पहुँचको राजनीतिमा लिप्त भइरहेको प्रवृत्तिप्रति चिन्ता व्यक्त गर्दै यसलाई सुधार गर्न गम्भीर ध्यान दिनुपर्ने धारणा व्यक्त गरे। कार्यक्रम सफल रूपमा सम्पन्न भएको आयोजकले जनाएको छ
