रामेछाप । सत्ता गठबन्धनबीच स्थानीय तहमा चुनावी तालेमेल गर्ने विषयमा आज पनी सहमती जुट्न सकेन । आज साँझ समम गठबन्धनको बैठक बस्ने र टुंगो लगाउने भनिए पनी टुंगो लाग्न सकेको छैन् । गठबन्धनमा आबद्ध पाँच दलबीच आज सिट बाँडफाँडको विषयमा छलफल भए पनी सहमती भने हुन सकेको छैन् । आठ वडा स्थानीय तहको ६४ वटा वडामै चुनावी तालमेल गर्ने सत्ता गठबन्धनको तयारी छ । तर गठबन्धनमा आबद्ध दलहरुले आ–आफ्नो दावी अघि सार्दै आएका छन् ।
माओवादीले सुनापति, दोरम्बा खाँडादेवी गाउँपालिका र मन्थली नगरपालिकामा दावी गरेको छ । गत स्थानीय तहको निर्वाचनमा माओवादीले सुनापति र दोरम्बा गाउँपालिकामा जितेको थियो ।
अहिले खाँडादेवी गाउँपालिका र मन्थली नगरपालिकामा पनि माओवादीको दावी छ । रामेछाप नगरपालिका जितेको कांग्रेसले खाँडादेवी, लिखु तामाकोसी गाउँपालिका, उमाकुण्ड गाउँपालिका र गोकुलगंगा गाउँपालिकामा दावी गरेको छ । केन्द्रको निर्देशन पालना भएको अवस्थामा कांग्रेस मन्थली नगरपालिकामा एकीकृत समाजवादीलाई छोडन तयार हुने केही नेताले बताएको छ । यद्यपी कांग्रेसले मन्थली नगरपालिकामा आफ्नो दावी कायमै राखेको छ ।
कांग्रेसले माओवादीलाई सुनापति दोरम्बा र अन्य एक गाउँपालिका लिन प्रस्ताव गरेपनि माओवादीले चार वटा स्थानीय तहमा आफ्नो दावी गर्दै आएको छ ।
चुनावी तालमेलको विषयमा छलफलमा कांग्रेस र माओवादीबीच मन्थली माविको विद्यालय व्यवस्थापन समितिको अध्यक्ष चयनको विषयलाई लिएर विवाद कायमै छ । कांग्रेसले पूर्व सहमति कार्यान्वयन गर्न माओवादीलाई दबाब दिए पनि माओवादीले साना कुरामा अल्झिएर गठबन्धनलाई नै प्रभावित पार्न नहुने तर्क गर्दै आएको छ ।