मन्थली- जिल्ला समन्वय समिति, रामेछापले संविधान दिवस २०८२ विभिन्न कार्यक्रम गरी भब्य रुपमा मनाउने तयारी गरेको छ । मंगलबार सम्पन्न समितिको बैठकले सरसफाइ, र्याली, अन्तरक्रिया, दिपावली, बिरामीलाई फलफूल वितरण गरी संविधान दिवस मनाउने निर्णय गरेको हो ।
जिल्ला समन्वय समिति प्रमुख चिना खड्का कार्कीले देशमा संविधान जारी भएको दिनको स्मरण र सम्मानमा लोकतन्त्र र नागरिक अधिकारको संरक्षण भएको रुपमा दिवस मनाउन लागिएको बताइन् ।
उनका अनुसार असोज २ देखि ४ गतेसम्म सबै निकायका कार्यालय तथा सर्वसाधारणले साँझ दीपावली गर्ने र आ-आफ्ना घर तथा कार्यालय परिसरको सरसफाइ गर्ने कार्यक्रम तय भएको छ। असोज ३ गते दिवसकै दिन सबै सरकारी कार्यालयमा नयाँ राष्ट्रिय झण्डा राख्ने, सोही दिन बिहान ७ बजे मन्थलीस्थित मदन आश्रित चोकबाट कटहर बोट हुँदै जिल्ला समन्वय समितिसम्म र्याली निकालिने र त्यसपछि संविधान कार्यान्वयन सम्बन्धी अन्तरक्रिया कार्यक्रम हुने छ । त्यस्तै मन्थलीस्थित विभिन्न अस्पतालमा भर्ना भएका बिरामीहरूलाई फलफूल वितरण गर्ने कार्यक्रम पनि तय भएको समितिका प्रमुख खड्काले बताइन् ।
दिवसकै दिन जेन–जी आन्दोलनमा ज्यान गुमाएका प्रति श्रद्धाञ्जली अर्पण गर्दै घाइतेको शीघ्र स्वास्थ्यलाभको कामना पनि व्यक्त गरिने छ । दिवस मनाउन मुल समारोह समिति पनि गठन गरिएको छ । संविधान दिवसमा आयोजित कार्यक्रमा सहभागी भई हर्षोल्लासपूर्वक मनाउन समेत नागरिकहरुलाई आव्हान गरिएको जिल्ला समन्वय समितिले जनाएको छ ।
