रामेछाप । रामेछापमा संविधान दिवस भव्यरुपमा सम्पन्न भएको छ । संविधान दिवस मूल समारोह समिति रामेछापको आयोजनामा संविधान दिवस भव्यरुपमा सम्पन्न गरिएको हो । बिहीबार संविधान दिवस मूल समारोह समिति रामेछापको आयोजनामा सदरमुकाम मन्थली बजारमा प्रभात फेरी कार्यक्रमको आयोजना गरिएको थियो । २०७२ साल असोज ३ गते संविधान सभाबाट संविधान जारी भएको हो ।
नेपालको संविधान २०७२ जारी भएको नौ वर्ष पुरा भएको सम्झनामा रामेछाप जिल्लामा गएको भदौ ३१ गते देखिनै विभिन्न कार्यक्रमहरू सञ्चालन भएका थिए । प्रभात फेरी पश्चात् जिल्ला समन्वय समितिको प्राङ्गणमा विशेष समारोहको आयोजना गरी संविधान दिवस तथा राष्ट्रिय दिवस कार्यक्रमको समापन गरिएको छ । संविधान दिवस मूल समारोह समिति रामेछापकी संयोजक तथा जिल्ला समन्वय समिति रामेछापकी प्रमुख चिना खड्का अध्यक्षता र बागमती प्रदेश प्रदेश सांसद आनन्द श्रेष्ठको प्रमुख आतिथ्ययतामा समापन समारोह भएको हो । यस्तै जिल्लामा रहेका पालिकाहरूले पनि विभिन्न रचनात्मक कार्यक्रमहरूको आयोजना गरी हर्षोल्लासका साथ संविधान तथा राष्ट्रिय दिवस मनाएका छन् ।
प्रभात फेरी कार्यक्रममा बागमती प्रदेश सांसद एवं पर्यटन तथा वातावरण समिति सभापति आनन्द श्रेष्ठ लगायत स्थानीय सरकार, राजनीतिक दल, सरकारी कार्यालय, गैरसरकारी सङ्घ–संस्था, नागरिक समाज, निजी क्षेत्र र सामाजिक संस्थाका प्रमुख एवं प्रतिनिधिहरूको सहभागिता रहेको थियो ।
