रामेछाप । मन्थली नगरपालिका–६ भलुवाजोरस्थित बोक्से पहरामा स्कारपियो गाडी दुर्घटना हुँदा श्रीमतीको मृत्यु भएको छ भने उनका श्रीमान् घाइते भएका छन्।
आइतबार बिहान करिब ७ बजे सदरमुकाम मन्थलीबाट हेटौँडा बस्ने छोरालाई भेट्न जाँदै गर्दा द्यब्ऋ ९४६३ नम्बरको स्कारपियो मन्थली–खुर्कोट सडकखण्डको बोक्से पहराबाट तामाकोशी नदीतर्फ खसेको जिल्ला प्रहरी कार्यालय रामेछापका प्रहरी निरीक्षक कौशल न्यौपानेले जानकारी दिए।
दुर्घटनामा मन्थली नगरपालिका–११ स्थायी घर भई मन्थली नगरपालिका–१ आकाशेमा बस्दै आएकी अन्दाजी ४० वर्षीया राधा कार्की चौहानको घटनास्थलमै मृत्यु भएको प्रहरीले जनाएको छ। गाडी अप्ठ्यारो भिरमा अड्किएको कारण उद्धारमा कठिनाइ भए पनि अहिले मृतकको शव निकालिएको छ।
घाइते भएका उनका श्रीमान् उत्तम चौहानलाई प्रारम्भिक उपचारपछि रामेछाप सामुदायिक अस्पतालबाट थप उपचारका लागि काठमाडौं लगिएको प्रहरीले जनाएको छ।
