रामेछाप — निर्वाचनमा खटिएको कर्मचारी तथा सुरक्षाकर्मी टोली सवार गाडी रामेछापमा भीरबाट खस्दा एक जना प्रहरीको मृत्यु भएको छ भने नौ जना घाइते भएका छन्।
जिल्ला प्रहरी कार्यालय रामेछापका इन्स्पेक्टर राजन तिमल्सिनाका अनुसार रामेछाप नगरपालिका–२ सिरुबारीस्थित सडकखण्डबाट करिब १०० मिटर तल गाडी खसेको हो। ना ७ ख ६७६८ नम्बरको उक्त गाडी निर्वाचन कार्यमा खटिएको टोली लिएर जाँदै गरेको थियो।
दुर्घटनामा परी असइ पर्शुराम यादवको ज्यान गएको प्रहरीले जनाएको छ। साथै दुई जना गम्भीर घाइतेसहित नौ जना घाइते भएका छन, भने एकको अवस्था गम्भिर रहेको छ । घटनाबारे थप अनुसन्धान भइरहेको प्रहरीले जनाएको छ।
