रामेछाप, २७ भदौ । देशभर बढ्दो आन्दोलन र विरोध कार्यक्रमका कारण शान्ति सुरक्षामा खलल पुग्न सक्ने भन्दै रामेछापमा पुनः कर्फ्यु आदेश जारी गरिएको छ । जिल्ला प्रशासन कार्यालय रामेछापका प्रमुख जिल्ला अधिकारी श्यामकृष्ण थापाले हस्ताक्षरित आदेश अनुसार, २०८२ साल भदौ २७ गते साँझ ९ बजेदेखि २०८२ साल भदौ २८ गते बिहान ६ बजेसम्म कर्फ्यु लागू हुने उल्लेख गरेको छ । यस अवधिमा कुनै पनि प्रकारको भीडभाड, प्रदर्शन, जुलुस, नारा–जुलुस र हिंसात्मक गतिविधि नगर्न अनुरोध गरिएको छ ।
कर्फ्यु आदेश रामेछाप नगरपालिकाको वडा नं २ को आकासे पुलदेखि दक्षिणतर्फ, मन्थली नगरपालिका र रामेछाप नगरपालिका बिचको सुकाजोर खोला पुल विटारामस्म, न्थली खुर्कोट सडक खण्डको सोलमारीस्थित सुकाजोर खोला पुल देखी मदनआश्रित चोक हुँदै सानीमदौं सिटिभिटी सम्म, मन्थली नगरपालिका १ का सबै क्षेत्र रामेछाप नगरपालिका ८ भंगेरी देखी गौरीशंकर मा.वि रामेछाप अस्पताल क्षेत्रमा क्षेत्रलाई लक्षित गरिएको छ ।
जिल्ला सुरक्षा समितिको निर्णयअनुसार जारी गरिएको आदेशमा रामेछाप जिल्लाभर कुनै पनि जुलुस, धर्ना, सडक अवरोध, प्रदर्शन वा अन्य शान्ति भंग गर्ने गतिविधि नगर्न निर्देशन दिइएको छ । प्रशासनले सुरक्षाको दृष्टिकोणले जनतालाई अनावश्यक रूपमा भीडभाड नगर्न र सुरक्षाकर्मीलाई सहयोग गर्न अपिल समेत गरेको छ ।
