मन्थली–रामेछापमा जिल्ला प्रशासन कार्यालयले निषेशाज्ञा जारी गरेको छ । जेनजी आन्दोलनबाट क्षति हुन नदिन मन्थलीमा गएराति १० बजेदेखि लगाइएको कफ्र्यू हटाइ सुरक्षा अवस्थाको मध्यनजर गरी जिल्लाभर निषेधाज्ञा जारी गरिएको हो ।
स्थानीय प्रशासन ऐन (संशोधन सहित), २०२८ को दफा ६ को उपदफा (३.क) बमोजिम आज बिहान १० बजेदेखि साँझ ६ बजेसम्मको लागि जिल्लाभार निषेधाज्ञा जारी गरिएको कार्यालयले जनाएको छ । प्रमुख जिल्ला अधिकारी श्यामकृष्ण थापाले निषेधाज्ञा परिपालना गरी धैर्य रहन नागरिकलाई अनुरोध गरेका छन् । उनका अनुसार निषेधाज्ञामा प्रदर्शन, जुलुस, हुल दङ्गा र ५ (पाँच) जना भन्दा बढि व्यक्तिहरु भेला हुन पाउने छैनन् । निषेधाज्ञाको पुर्ण पालना गराउन सबै सुरक्षाकर्मीहरको परिचालन भएका प्रमुख जिल्ला अधिकारी थापाले जानकारी दिए ।
निषेधाज्ञा जिल्लाका सबै पालिका रहेको स्थान र वडा कार्यालय रहेका स्थानहरुमा लागू भएको छ । त्यसैगरी मन्थली नगरपालिकाको वडा नं. २ आकासे पुलदेखि दक्षिणतर्फ मन्थली नगरपालिका र रामेछाप नगरपालिका वीचको सुकाजोर खोला पुल (बिटारसम्म ), मन्थली खुर्कोट सडक खण्डको सोलमारीस्थित सुकाजोर खोला पुलदेखि मदनआश्रित चोक हुँदै सानीमदौ सिटिइभिटिइ सम्म, मन्थली नगरपालिका वडा नं. १ का सबै क्षेत्र र रामेछाप नगरपालिका वडा नं. ८ भंगेरी देखि गौरीशंकर मा.वि. तथा रामेछाप अस्पताल क्षेत्रसम्ममा निषेधाज्ञा लागू गरिएको छ ।
