मन्थली–जल तथा मौसम विभागको पूर्वानुमान अनुसार रामेछापमा शनिबार भारी बर्षा भइरहेपनि अवस्था सामान्य रहेको छ ।
प्रमुख जिल्ला अधिकारी श्याम कृष्ण थापाले जिल्लाभर निरन्तर वर्षा भइरहे पनि हालसम्म कुनै अप्रिय घटना नभएको जानकारी दिनुभयो ।
उहाँले रामेछापमा अन्य जिल्लामा जस्तो ठूलो क्षति हुने किसिमको कुनै घटना हालसम्म नभएको र अवस्था सामान्य रहेको बताउनु भयो ।
“स्थानीय विपद् व्यवस्थापन समिति र सुरक्षाकर्मीहरुसँग हामी निरन्तर सम्पर्कमै छौँ । हालसम्म कुनै अप्रिय घटनाको जानकारी प्राप्त भएको छैन । उहाँले भन्नुभयो ।
उहाँका अनुसार सडकहरुमा सामान्य पहिरो गएपनि सवारी आवागमन अबरोध हुने ठूलो समस्या आएको छैन । तर सम्भावित जोखिमको विश्लेषण गरी यात्रुहरुलाई सुरक्षित हुन होल्ड गरिएको छ । हालसम्म रामेछाप सुरक्षित रहेपनि राति झन् ठूलो वर्षा हुने हुँदा सचेत हुनुपर्ने प्रमुख जिल्ला अधिकारी थापाले बताउनु भयो । उहाँले विपद प्रति कार्यका लागि सबै संयन्त्र परिचालन गरी हाइअर्लटमा रहेको जानकारी दिनु भयो ।
