रामेछाप । जिल्लाका विभिन्न तीन स्थानमा एकैदिन आगलागी भएको छ । आगलागीमा परि मन्थली नगरपालिका वडा नं–५ सुनारपानीमा दुईवटा गोठ जलेर नष्ट भएका छन् ।
मन्थली नगरपालिका वडा नं–५ सुनारपानीको डाँडापारी सामुदायिक वनमा मंगलवार दिउँसो आगलागी भएको थियो । सामुदायिक वनमा लागेको आँगो सल्कदै जाँदा मन्थली नगरपालिका वडा नं ५ सुनारपानी चिहानडाँडाका ज्ञानवहादुर भुजेल र शेरवहादुर भुजेलको दुईवटा गोठ जलेर पूर्णरुपमा नष्ट भएका छन् । सुनारपानीमा लागेको आँगो निभाउन जिल्ला प्रहरी कार्यालय रामेछापवाट गएको प्रहरी टोली, सदरमुकाम मन्थलीवाट गएको सशस्त्र प्रहरीको टोली, मन्थली नगरपालिकाको दमकल र स्थानिय नागरिकहरुको सक्रियतामा उक्त आगो नियन्त्रणमा लिइएको जिल्ला प्रहरी कार्यालय रामेछापका प्रवक्ता श्रीशंकर श्रेष्ठले जानकारी दिए ।
त्यस्तै मन्थली नगरपालिका वडा नं–६ भलुवाजोरको सामुदायिक वनमा समेत आगलागी भएको छ । उक्त आगलागी भएको स्थानमा अहिले नागरिकहरुले आगो निभाउने काम भइरहेको छ । घना सामुदायिक वन रहेको उक्त स्थानमा वस्ती टाढा रहेको छ । आगलागी भएको स्थानसम्म जाने सडक नभएको कारण दमकल लगेर आगो निभाउन नसकिएको मन्थली नगरपालिका वडा नं–६ का वडा सदस्य प्रेमवहादुर तामाङ्गले जानकारी दिए ।
त्यसैगरी लिखु तामाकोशी गाउँपालिका वडा नं–३ बिजुलीकोटमा रहेको झट्टेश्वरी सामुदायिक वनमा पनि आगलागी भएको छ । दिउँसो देखी सामुदायिक वनमा लागेको आगो बढ्दै जाँदा बस्ती नजिक पुगेको थियो । उक्त आगो निभाउन इलाका प्रहरी कार्यालय धोवीवाट प्रहरी पुगेको थियो भने स्थानियहरुको समेत सहभागीतमा आँगो नियन्त्रणमा लिएको जिल्ला प्रहरी कार्यालय रामेछापका प्रवक्ता श्रेष्ठले बताए । आज भएको आगलागीमा के कती क्षती भयो भन्ने विवरण भने आउन बाँकी रहेको प्रहरीले जनाएको छ ।
