रामेछाप । स्थानिय प्रशासनले निषेधाज्ञालाई खुकुलो बनाएसँगै रामेछापमा कोरोना संक्रमण हुनेको दर केहीदिन यता ह्वात्तै बढेको छ । शनिवार मात्रै रामेछापमा ६० जनामा कोरोना पुष्टि भएको छ ।
केहिदिन देखी रामेछापमा कोरोना संक्रमण दरका विरामी दैनिक २० भन्दा माथि हुने गरेका छन् । शनिवार जिल्लामा कोरोना संक्रमित हुनेहरुमा जिल्ला अस्पताल रामेछापमा ५ जना, प्राथमिक स्वास्थ्य केन्द्र मन्थलीमा ४ जना, मन्थली स्थित तामाकोशी अस्पतालमा २ जनामा कोरोना संक्रमण पुष्टि भएको छ ।
त्यसैगरी खाँडादेवी गाउँपालिकामा ५ जना, गोकुलगंगा गाउँपालिकामा ३ जना, दोरम्वा शैलुङ्ग गाउँपालिकामा २ जना र लिखु तामाकोशी गाउँपालिकामा १ जना एन्टिजेन विधिवाट परिक्षण गर्दा उनीहरुमा कोरोना संक्रमण पुष्टि भएको जिल्ला स्वास्थ्य कार्यालय रामेछापका जनस्वास्थ्य अधिकृत भुवन थापाले जानकारी दिए ।
त्यसैगरी पिसिआर विधिवाट कोरोना परिक्षण गर्दा मन्थली नगरपालिकामा २२ जना र रामेछाप नगरपालिकामा १६ जना गरि ३८ जनामा कोरोना संक्रमण पुष्टि भएको जिल्ला स्वास्थ्य कार्यालय रामेछापले जनाएको छ । शनिवार ६० जना कोरोना संक्रमितको संख्या थपिएसँगै रामेछापमा हालसम्म कोरोना संक्रमण हुनेको संख्या २ हजार ७ सय ११ जना पुगेको छ । जसमध्ये हालसम्म २ हजार ४ सय ४७ जनाले कोरोनालाई जितेर घर फर्किएका छन् भने कोरोनाका दोश्रो लहरमा २२ जनाले ज्यान गुमाएका छन् ।
जिल्लामा शनिवार (आज) १२ जनाले कोरोनालाई जितेर संक्रमित घर फर्किएका छन् । घर फर्कनेमा मन्थली नगरपालिकाका १० जना र रामेछाप नगरपालिकाका २ जनाले कोरोनालाई जितेर उनीहरु घर फर्किएका हुन् । जिल्लामा हाल २ सय ४२ जना संक्रिय कोरोना संक्रमितहरु मध्ये केही निजि अस्पताल त केही सरकारी अस्पतालको आइसोलेसनमा बसेर उपचाररत रहेका छन् भने केही संक्रमितहरु आफ्नै घरमा होमआइसोलेसनमा बसेर उपचाररत रहेको जिल्ला स्वास्थ्य कार्यालय रामेछापले जनाएको छ ।
