मन्थली-जिल्ला प्रहरी कार्यालय रामेछापले दशैँको समयमा ट्राफिक नियम उल्लंघन गर्ने १ सय भन्दा बढी सवारी साधनलाई कारबाही गरेको छ ।दशैँको फूलपातीदेखि कोजाग्रत पूर्णिमासम्म १ सय ३० वटा सवारीलाई ट्राफिक नियम नमानेपछि कारबाही गरिएको हो ।
ट्राफिक प्रहरीले चाडपर्वमा दुर्घटना कम गर्न विशेष चेकजाँच अभियान चलाएको थियो। यस क्रममा सिट क्षमताभन्दा बढी यात्रु बोक्ने, ओभरलोड गर्ने, सिटबेल्ट र हेल्मेट प्रयोग नगर्ने लगायतका नियम तोड्ने ट्रक, बस, कार, जीप, ट्याक्टर र मोटरसाइकल कारबाहीमा परेका हुन्। जिल्ला प्रहरी कार्यालय प्रमुख सुवासचन्द्र मण्डलका अनुसार ट्राफिक नियम नमानेका सवारी साधन कारबाहीबाट १ लाख २० हजार रुपैयाँ राजस्व संकलन भएको छ । उहाँले ट्राफिक प्रहरीको उद्देश्य राजस्व संकलन गर्नु होइन दुर्घटना कम गराउनु रहेको बताउनु भयो । यसका लागि नियम परिपालना गराउने क्रममा अटेर गर्नेहरुलाई कारबाही पनि गर्ने गरिएको उहाँले बताउनु भयो ।
दशैँमा ४ सवारी दुर्घटना, २ जनाको मृत्यु
रामेछापमा दशैंको अवधिमा ४ वटा सवारी दुर्घटना भएका छन् । तथ्याङक अनुसार दुइ कारजीप र दुइ मोटरसाइकल दुर्घटनामा परेका हुन् । दुर्घटनामा २ जना पुरुष मृत्यु भएको छ, भने ९ जना सामान्य घाइते भएका थिए । घाइते हुनेमा २ बालिका, ३ महिला र ४ पुरुष थिए ।
ट्राफिक प्रहरी कार्यालय प्रमुख मण्डलले ट्राफिक नियमको पालना गरे, इन्जिनको अवस्था ठिक राखे दुर्घटनाको जोखिम शुन्य प्राय हुने बताउनु भयो ।
