रामेछाप । राजस्व सङ्कलनलाई देशको अर्थतन्त्रमा सकारात्मक लिने गरिन्छ । तर रामेछाप जिल्लाको विभिन्न बजार क्षेत्रमा अनुगमन गर्दा भने राजश्व सङ्कलनमा खुसी भन्दा बढी दुःख हुन पर्ने देखिन्छ । किनकि बढी मात्रामा राजस्व म्याद गुज्रेका र अखाद्य पर्दाथ बिक्रिबितरण गरेका व्यवसायिहरुलाई जरिवाना गरेर सङ्कलन गरेको देखिन्छ ।
जसले जिल्लामा म्याद गुज्रेका र अखाद्य बस्तु बिक्री वितरण भएको भन्ने देखाउने गरेको छ । गाउँ गाउँका सबै सर्वसाधारणको अवस्था म्याद गुज्रेको वा अखाद्य बस्तु छुटाउन सक्ने छैन । जसको कारण व्यवसायीले नागरिको स्वास्थ्यमा प्रत्यक्ष खेलवाड गरेको पुष्टि हुन्छ । जिल्ला प्रशासन कार्यालय रामेछापमा सोमबार बसेको जिल्ला स्तरीय बजार अनुगमन समितिको बैठकमा उद्योग तथा वाणिज्य कार्यालय रामेछापका प्रमुख सुबोध कुमार शाह कर्मयोगीले बजार अनुगमनको अवस्थाबारे जानकारी गराएका थिए ।
उक्त जानकारीमा चालु आथिक वर्षमा रामेछापका विभिन्न पालिकाहरूमा गरिएको बजार अनुगमन बाट २ लाख,२८ हजार ५ सय रुपैयाँ राजस्व सङ्कलन भएको जानकारी दिए । उद्योग तथा वाणिज्य कार्यालय रामेछापका प्रमुख कर्मयोगीले बताए अनुसार – चालु आर्थिक वर्ष (साउन देखि हाल सम्म ) मन्थली नगरपालिकामा २८४ वटा, लिखु तामाकोसी गाउँपालिकामा ३० वटा र रामेछाप नगरपालिकामा ६ वटा गरी कुल ३ सय २० वटा बिन्दुहरू अनुगमन गर्दा म्याद गुज्रेका १३ हजार पन्चानब्बे रुपैयाँ बराबरको समान पनि बरामद गरी नष्ट गरिएको छ ।
