मन्थली -रामेछापमा शनिबार पनि बिहानैदेखि मेघगर्जन सहित वर्षा भइरहेको छ। दशैँको रमझम नसकिदैँ जल तथा मौसम विज्ञान विभागको पुर्वानुमान अनुसार यहाँ बर्षा भइरहेको हो । बाढी पहिरोको खतरा बढ्ने गरी मौसम असामान्य बनेपछि दशैँ, दशा बन्ने चिन्ता बढेको छ ।
यद्यपि व्यापक पूर्वसूचना र तयारीका कारण कुनै मानवीय क्षति हुने सम्मका घटना नहुने विश्वास गरिएको जिल्ला प्रशासन कार्यालय रामेछापले जनाएको छ । कार्यालयले एक सूचना जारी गर्दै भारी बर्षा हुने र विपत्ति निम्तिने खतरा रहेकोले सबैलाई सतर्क हुन आग्रह गरेको छ ।
महान चाड दशैँ घमाइलो र रमाइलो हुने अपेक्षा गरेका सर्वसाधारणलाई बर्षाले खल्लो बनाएको छ । ससुराली, मावली, माइत तथा आफन्तकोमा टिका थाप्न जान समस्या भएको छ । बर्षा छिटै रोकिएला र आफन्तकोमा जाउला भनेर धरै जना त धैर्य, सचेत र सुरक्षित भएर बसिरहेका छन् । यसरी नै सबै जना सचेत र सुरक्षित रहन प्रमुख जिल्ला अधिकारी श्याम थापाले आग्रह गर्नु भएको छ । उहाँले कहिँकतै बर्षाजन्य घटना भइहालेमा तत्काल खबर गर्न र उद्दार एवं राहतमा जुट्नका लागि सहयोग गर्न अनुरोध गर्नु भएको छ । जीवन रहे चाड त अर्को वर्ष पनि आउँछ तर जीवन फर्केर आउदैन । त्यसैले कुनै हेलचेक्राँइ नगरी सर्तक रहन उहाले भन्नु भयो ।
उहाँका अनुसार जिल्ला विपत व्यवस्थापन समिति र पालिकाका स्थानीय विपत व्यवस्थापन समितिहरु बर्षाजन्य विपतको प्रति कार्यका लागि तयार रहेका छन् । अघिल्ला बर्षको दशैँ अघि पनि यस्तै बर्षा भएको थियो । तर पर्याप्त सूचना र तयारिको अभाका कारण देशले ठूलो क्षति बेहोर्नु परेको थियो । यो बर्षा यस्तो नहोस् हामी पनि यहि कामना गर्दछौँ ।
