रामेछाप । जिल्ला स्तरीय कोभिड–१९ संङ्कट व्यवस्थापन केन्द्र रामेछापको मङ्गलवार बसेको बैठकले यस अघि गरिएको निषेधाज्ञालाई केही खुकुलो बनाउँदै आगामी असार १५ गते मध्यरात १२ वजेसम्म निषेधाज्ञा थप गरेको छ ।
जिल्ला स्तरीय सङ्कट व्यवस्थापन केन्द्रका अध्यक्ष एवं प्रमुख जिल्ला अधिकारी गौलोचन सैजुको अध्यक्षतामा बसेको वैठकले उक्त निर्णय गरेको हो । बैठकले भोली बुधवारवाट स्वास्थ्य सुरक्षाकोे मापदण्ड अपनाएर रेष्टुरेन्ट, खाजाघर, चियापसल र होटल समेत खुल्न दिने निर्णय गरेको हो ।
त्यसैगरी बैठकले पशुपंक्षीका दाना, तरकारी, खाद्यसामाग्री, फलफूल, माछा, मासु, ग्याँस, पानी, पेट्रोलपम्प, रेष्टुरेन्ट, खाजाघर, चियापसल र होटल, निमार्ण सामाग्री विक्रीवितरण, पाठ्यपुस्तक पसल र प्रिन्टिङ्ग प्रेस लगाएतका पसलहरु स्वास्थ्य सुरक्षा पूर्णरुपमा पालना गरि अर्को सूचना नभएसम्म प्रत्येक दिन विहान ५ वजेदेखी दिउँसो ३ वजेसम्म सञ्चालन गर्न पाउने निर्णय गरेको हो ।
त्यस्तै रामेछापमा रहेका बैंक तथा वित्तिय संस्थाहरु दैनिक रुपमा बिहान १० वजे खुल्ने र दिउँसो ३ वजेसम्म सञ्चालन गर्न पाउने छन् । यसैगरी दूधजन्य डेरी पसलहरु, सवारी मर्मत वर्कसप प्रत्येक दिन विहान ५ वजे खुल्ने र साँझ ५ वजे बन्द गनुपर्ने निर्णय गरिएको जिल्ला स्तरीय कोभिड–१९ संङ्कट व्यवस्थापन केन्द्र रामेछापले जनाएको छ ।
बैठकले यसवाहेकका जिल्ला भित्रका सवै शैक्षिक संस्थावाट हुने पठनपाठन, परीक्षा, प्रशिक्षण, तालीम, गोष्ठी, मेला महोत्सव, हाटवजार, जात्रा, पर्व, खेलकुद, स्वीमीङ पुल, सपिङ महल, मनोरञ्जन स्थल, फुडसल, हेल्थक्लव, जिमखाना, पुस्ताकालय, पार्टी प्यालेस, सैलुन र व्युटिपार्लर लगायतका व्यवासयहरुमा भने पूर्णरुपमा रोक लगाएको छ ।
त्यसैगरी बैठकले जिल्लाका अधिकासं सरकारी कार्यालय र सार्वजनिक निकायहरुले पूर्णरुपमा स्वास्थ्य मापदण्ड पालना गरी आलोपालो प्रणालीवाट कार्यालय खोली नागरिकहरुलाई सेवा प्रदान गर्नुपर्ने निर्णय समेत गरेको छ । त्यस्तै वैठकले थप भएको निषेधाज्ञाको समयमा अत्यावश्यक काम नभई घरवाट निस्कन, हिड्डुल गर्न साथै जिल्ला भित्र छोटो तथा लामो दुरीमा चल्ने सवै सवारीसाधन सञ्चालनमा रोक लगाएको जनाएको छ ।
