रामेछाप । सिन्धुलीमा जारी ‘तेस्रो राष्ट्रिय माझी गोल्ड कप’ फुटबलको उपाधि आयोजक सिन्धुलीले राख्न सफल भएको छ । मङ्गलवार सम्पन्न खेलमा ६–७ ले हराउँदै सिन्धुलीले उपाधि आफ्नो कब्जामा राख्न सफल भएको हो ।
सिन्धुलीको हरिहरपुर गाउँपालिका वडा नं ५ बोटेनी खेल मैदानमा भएको खेलमा नेपाल माझी उत्थान सङ्घ सिन्धुली ‘ए’ ले नेपाल माझी उत्थान सङ्घ रामेछापमाथि ७–६ ले जित निकालेको हो । दिउँसो २ बजेदेखि सुरु भएको खेलमा सुरुवाती अग्रता लिएको रामेछापलाई रोक्दै सिन्धुलीले उपाधि चुम्यो । निर्धारित समयसम्म दुवै तर्फ २–२ को बराबरीमा पुगेपछि खेल ट्राई बेकरमा गएको थियो । जसमा सिन्धुलीले ७ गोल ग¥यो भने रामेछापले ६ गोल मात्रै गर्न सक्यो ।
उपाधि जितेसँगै आयोजक सिन्धुलीले प्रथम पुरस्कार नगद २ लाख ६५ हजार ५५५ रुपैयाँ सहित कप, मेडल र प्रमाण पत्र प्राप्त गरेको छ । विजेता खेलाडीहरूलाई युवा तथा खेलकुद मन्त्री डिकबहादुर लिम्बूले पुरस्कार प्रदान गरे । त्यस्तै उपविजेता रामेछापले १ लाख ३२ हजार २२२ रुपैयाँ सहित कप, मेडल र प्रमाण पत्रमा चित्त बुझाएको छ । भने सिन्धुपाल्चोकलाई ट्राई बेकरमा ३–२ ले हराउँदै सुनसरी जिल्लाले जितेको छ । उसले नगद ६६ हजार ६६६ मेडल र प्रमाण पत्र प्राप्त गरेको छ ।
विभिन्न विधामा समेत खेलाडीहरू नगद १५ र १० हजार सहित पुरस्कृत भएका छन् । यही कात्तिक १३ गतेदेखि सुरु भएको देश भरीका माझी समुदायका फुटबल खेलाडी सम्मेलीत खेलमा २३ टिमको सहभागिता रहेको थियो ।
समापन कार्यक्रममा सिन्धुलीका प्रतिनिधिसभा सदस्य (सांसद) लेखनाथ दाहाल (राजन) सहित नेपाल माझी उत्थान सङ्घका केन्द्रीय अध्यक्ष चिनीमाया माझी, माझी चलचित्र सङ्घका अध्यक्ष पदम कुमारी माझी (सिजिका), नेपाल माझी विद्यार्थी उत्थान सङ्घका अध्यक्ष धनबहादुर माझी, नेपाल माझी उत्थान सङ्घ केन्द्रीय महासचिव तथा जिल्ला अध्यक्ष बबिन्द्रलाल माझी लगायत नगरपालिकाका प्रमुख, उपप्रमुखहरूको उपस्थिति रहेको थियो ।
