मन्थली–जेनजीको आन्दोलनले देशमा बितन्डा मच्चाएपछि रामेछापमा कफ्र्यू लगाइएको छ । हिसांत्मक गतिविधि रोकथाम तथा नियन्त्रणका लागि जिल्ला प्रशासन कार्यालयले मन्थलीको विभिन्न क्षेत्रमा कफ्र्यू आदेश जारी गरेको हो ।
कार्यालयले एक सूचना सार्वजनिक गर्दै स्थानीय प्रशासन ऐन, २०२८ को दफा ६ को उपदफा (३) बमोजिम कफ्र्यू जारी गरिएको जानकारी दिएको छ । प्रमुख जिल्ला अधिकारी श्यामकृष्ण थापाका अनुसार मंगलबार राति १० बजेदेखि बुधबार ६ बजेसम्म कफ्र्यू लागू हुनेछ । यो अवधिमा भेला, जुलुस, प्रदर्शन, सभा, बैठक, धर्ना र आवतजावत पूर्ण रूपमा निषेध गरिएको प्रजिअ थापाले बताए ।
मन्थली नगरपालिका वडा नं. २ आकासे पुलदेखि दक्षिणतर्फ मन्थली नगरपालिका र रामेछाप नगरपालिका वीचको सुकाजोर खोला पुल (बिटारसम्म), मन्थली खुर्कोट सडक खण्डको सोलमारीस्थित सुकाजोर खोला पुलदेखि मदनआश्रित चोक हुँदै सानीमदौ सीटिइभिटिइ सम्म, मन्थली नगरपालिका वडा नं. १ का सबै क्षेत्र र रामेछाप नगरपालिका वडा नं. ८ भंगेरी देखि गौरीशंकर मा.वि. तथा रामेछाप अस्पताल क्षेत्रभित्र कफ्र्यू लगाइएको हो । कफ्र्यू उल्लंघन गरेमा कानूनी कारबाही हुने जिल्ला प्रशासन कार्यालयले जनाएको छ ।
जेनजी आन्दोलनको नाममा लुटपाट लगायतका आपराधिक गतिविधि हुने सक्ने देखिएपछि त्यसको रोकथाम र तथा नियन्त्रणका लागि रामेछापका बैँकवित्तिय संस्था एवं सरकारी कार्यालयहरुमा रातीदेखि नै नेपाली सेना परिचालन गरिएको प्रशासनले जनाएको छ ।