रामेछापका शिक्षक, कर्मचारीलाई बालमनोविज्ञानमा प्रत्यक्ष असर पर्ने गरी भिडियो नबनाउन आग्रह गरिएको छ ।
शिक्षा विकास तथा समन्वय इकाइ, रामेछापले एक सूचना जारी गर्र्दै विद्यालय समयमा बालमनोविज्ञानमा असर पर्ने गरी भिडियो नबनाउन आग्रह गरेको हो ।
शिक्षा, विज्ञान तथा प्रविधि मन्त्रालय र शिक्षा मानव स्रोत विकास केन्द्रको पछिल्लो पत्रका आधारमा यस्तो आग्रह गरिएको इकाइले जनाएको छ । विद्यालयमा शिक्षक, कर्मचारीले जथाभावी टिकटक भिडियो बनाउँदा शैक्षिक वातावरण र बालमनोविज्ञानमा असर पर्ने हुँदा यसलाई नियन्त्रण गर्ने उद्धेश्य लिइएको इकाइ प्रमुख नेत्रप्रसाद गजुरेलले बताए ।
शिक्षण कार्यमा सामाजिक सञ्जालको भरपुर उपयोग गरी शैक्षिक गुणस्तर कायम राख्न सकिन्छ । तर दुरुपयोग गर्दा शैक्षिक अवस्था झन् नाजुक बन्ने भएकोले जथाभावी टिकटक लगायतका भिडियो बनाउन र पोस्ट गर्ने कार्य बन्द गर्न आग्रह गरिएको इकाइ प्रमुख गजुरेलले बताए ।