मन्थली । रामेछापमा एस. इ. इ. २०८० को उत्तर पुस्तिका परीक्षण गर्ने शिक्षकहरूले शिक्षा विकास तथा समन्वय इकाई रामेछाप मार्फत परीक्षा नियन्त्रण कार्यालय भक्तपुरलाई ज्ञापन पत्र बुझाएको छ । उत्तर पुस्तिका परीक्षण बापतको रकम (पारिश्रमिक) न्यून भएको भन्दै मङ्गलवार उनीहरूले ज्ञापन पत्र बुझाएका हुन् ।
परीक्षा नियन्त्रण कार्यालय भक्तपुरले उत्तर पुस्तिका परीक्षण गरेबापत हाल प्रति गोटा रु २४ का दरले (कर सहित) रकम उपलब्ध गराउँदै आएको थियो । उनीहरूले उत्तर पुस्तिका परीक्षण गरेबापदको पारिश्रमिक प्रति गोटा रु ४० रुपैयाँ माग गरेका छन् । एक हप्ता सम्म पनि आफ्नो जायज मागहरू पुरा नभए जिल्लाका सबै शिक्षकहरूले उत्तर पुस्तिका परीक्षण नगर्ने चेतावनी समेत ज्ञापन पत्र मार्फत दिएका छन् ।
ज्ञापन पत्र बुझाउँदै शिक्षक पार्वती कडरियाले – “२०७२ साल देखि उत्तर पुस्तिका परीक्षण गरेको रकम एउटै छ । दिनभरमा ५० वटा पनि उत्तर पुस्तिका परीक्षण गर्न सकिँदैन त्यसो हुँदा दिनमा रु १ हजार पनि मुस्किलले हुन्छ यो ट्रेड युनियनको अधिकार विपरीत हुन्छ ।”
ज्ञापन पत्र बुझ्दै शिक्षा विकास तथा समन्वय इकाई रामेछापका निमित्त कार्यालय प्रमुख वालकृष्ण ढुङ्गेलले उत्तर पुस्तिका परीक्षण गर्ने शिक्षकहरूले बुझाएको ज्ञापन पत्र जस्ताको तस्तै परीक्षा नियन्त्रण कार्यालयमा पठाएर आवश्यक समन्वय गर्ने प्रतिबद्धता व्यक्त गरेका छन् ।
ज्ञापन पत्रमा नेपाली, अग्रेजी, गणित, विज्ञान,सामाजिक, कार्यालय सञ्चालन, र अर्थशास्त्र विषयको बिषयत शिक्षकहरू क्रमशः गुण बहादुर सार्की, मोतीलाल लामा, सुरेन्द्र के शी, नीलकण्ठ पुरी, पार्वती कडरीया, अमित कुमार सिंह र विनोद पौडेलले प्रतिनिधि मूलक ढङ्गबाट हस्ताक्षर गरेका छन् ।
