रामेछाप । रामेछाप जिल्लाको रामेछाप नगरपालिका वडा नम्बर ९ टारका आगलागी पीडितलाई रामेछाप युके परिवारले नगद सहयोग गरेको छ । रामेछाप जिल्लाको विभिन्न स्थान बाट युके पुगेका रामेछाप वासीहरूले आगलागी पीडितलाई चार लाख बढी रकम सहयोग गरेको हो । यही चैत्र १ गते भएको आगलागीबाट घर जलेर नष्ट भएका १३ घर परिवारलाई ४ लाख २९ हजार २ सय ५५ रुपैयाँ सहयोग रकम प्रदान गरिएको हो ।
मङ्गलवार रामेछाप नगरपालिकाका प्रमुख लबश्री न्यौपाने,वडा नं ८ का वडा अध्यक्ष सन्तोष कुमार तामाङ, रामेछाप युके परिवारका सल्लाहकार होम बहादुर सुनुवार सहितको टोली टार गाउँमै पुगेर पीडितलाई आर्थिक सहयोग हस्तान्तरण गरेका छन् । रामेछाप युके परिवारका अध्यक्ष प्रताप लामाको समन्वयमा युकेमा बसोबास गर्ने ४१ जना नेपालीहरूले उक्त रकम सहयोग गरेको वडा अध्यक्ष तामाङले बताए । आगलागी पीडित १३ घर परिवारलाई प्रति परिवार ३३ हजारका दरले उक्त रकम हस्तान्तरण गरिएको छ । आगलागी पीडितलाई रकम हस्तान्तरण गर्दै रामेछाप नगरपालिकाका नगर प्रमुख लबश्री न्यौपानेले सहयोगी मनहरू र रामेछाप युके परिवारलाई धन्यवाद व्यक्त समेत गरेका छन् ।
